NAGPANIKAD na ba kang molaag? Karong giluagan na ang community quarantine classification sa pipila ka bahin sa Pilipinas, giablihan na usab pagbalik ang turismo.
Niadtong Pebrero sa wala pa gipatuman ang quarantine, akong gibisita ang Soccksargen ug usa sa mga lugar nga akong gi-adto mao ang lungsod sa Lake Sebu sa South Cotabato.
Lahi sa ubang lugar sa Pilipinas, nihit ra ang turista sa South Cotabato. Gawas nga tuyuonon, negatibo usab ang imahe sa lugar tungod kay anaa kini nahimutang sa Mindanao.
Apan dihang nafeature kini ni Miss Universe 2018 Catriona Gray, na engganyo ko nga iapil ang South Cotabato sa akong bucket list.
Ang kaniadtong mingaw nga dapit, inanay ng nihimo og dungog ang South Cotabato gumikan sa talagsaon nga tourist spots. Lahi sa among expectation, malinawon ug hapsay ang probinsya.
Gani, maabi-abihon sa mga turista ang mga lokal.
Gawas sa mga talan-awon, excited usab ko nga makasaksi ug masayod sa kultura sa mga T’boli.
Sila ang labing ilado sa tanang ethnic group sa Mindanao nga nagpuyo sa lungsod sa Lake Sebu. Dali silang mailhan tungod sa colorful nila nga mga sinina ug mga accessories sa ilang lawas.
Naila ang mga T’boli sa natad sa pag-weave og T’nalak tungod kay pang world-class ang quality, ilado na usab kini sa ubang nasud.
Aron sulit ang imong pagsuroy sa South Cotabato, igo na ang duha ka adlaw nga pag-istar sa dapit.
Ang nag unang panginabuhian sa mga taga Lake Sebu mao ang aquaculture. Dinhi nimo matilawan ang lain laing putahe o klase sa pagluto sa tilapia.
LOTUS VIEWING
Usa sa ilado nga tourist attraction sa Lake Sebu mao ang lotus. Haum mag lotus viewing sayo sa kabuntagon sa dili pa mosidlak ang haring adlaw sanglit niining orasa lang mobuka ang mga buwak. Sakay sa canoe, imong masaksihan ang talagsaon nga pagbuka sa dul-an 500 ka mga pink lotus.
Aron makompleto ang experience, adunay mga homestay nga magpaabang og tradisyonal nga sinina sa mga T’boli.
MUSEUM
Angay’ng bisitahon usab sa Lake Sebu mao ang T’boli Museum.
Dinhi makita ang mga koleksyon sa antique nga butang ingong man gongs, T’nalak, ug artifacts sa kultura sa T’boli.
ZIPLINE, TREKKING
Dili kompleto ang Lake Sebu trip kon dili mosuway sa ilang zipline.
Unique ang experience sanglit mabusog ang imong mga mata samtang anaa sa ibabaw sa nindot ug majestic nga pito ka mga busay sa Lake Sebu.
Gitawag og Hikung Alu ang falls 1, Hikong Bente ang falls 2, Hikong B’lebed ang ikatulong busay, Hikong Lowig ang falls 4, Hikong Kefo-i ang falls 5, Hikong Ukol ang tawas sa falls 6 ug ang ika-pito mao ang Hikong Tonok ang falls 7.
Mamahimo usab nga ma-trek o hike ang pipila sa mga waterfalls.
TIPS
Habal-habal ang transportasyon kon molaag sa Lake Sebu.
Mas maayong magdala og igong kwarta sanglit nihit lang ang ATM sa lungsod.
Ubay-ubay na ang resort ug homestay sa Lake Sebu. Apan kon buot nimong ma-experience ang day-in-a-life sa mga T’boli, sa School of Living Tradition Homestay pag-istar.
UNSAON PAG-ADTO
Gikan sa Cebu, adunay direct flight padulong sa General Santos City o ba kaha sa Cotabato. Mamahimong mag DIY (do-it-youself) o mokuha og tour guide pinaagi sa pagtawag sa ilang local tourism office.
Sagad sa mga resort ug homestay nag-offer usab og tour.
Mga ka-Super, sa dili pa magplano sa laag ilabina karong panahon sa pandemya, i-check una ang destinasyon ug siguroa kon modawat na og turista ang dapit.
Giawhag usab ang tanan nga motuman sa istriktong health protocol ug rekisitos tagsa-tagsa ka mga local government unit.