USA ka taas nga opisyal sa New People’s Army (NPA ang nitahan sa kapulisan sa Probinsya sa Bohol niadtong Martes, Septiyembre 15.
Ang nitahan giila nga si Joseph Gulle Galagar, alyas 'Rakam' ug 'Joshua'. Gitahan usab ni Galagar ang duha ka armas nga .38 kalibre nga revolver ug duha ka mga pumpboat ug mga subersibong dokumento.
Sumala sa Police Regional Office (PRO) 7, si Galagar usa ka lider sa Squad 2 ubos sa Sandatahang Yunit Pangpropaganda sa Bohol Party Committee sa Communist Party of the Philippines (CPP).
Siya usab ang chairperson sa Cogtong Fisherman Association nga sangang sa Anakpawis ug Hugpong Mag-uumang Bol-anon-Kilusang Magbubukid ng Pilipinas (HMB-KMP).
Usa sa mga trabaho ni Galagar mao ang pagdala sa mga cadre sa NPA, armas mga gamit ug pagkaon sa Bohol, Cebu ug Negros Oriental.
Matod ni Police Brigadier General Albert Ignatius Ferro, hepe sa PRO 7, ang pagtahan ni Galagar dakong kawad-on sa mga komunistang grupo.
“This development will allow former rebels to rebuild their lives with their respective families. The government as well as the Philippine National Police are sincere in helping them who courageously abandoned the senseless and bloody armed struggle,” matod ni Ferro.
Adunay mga sinsitibong impormasyon nga gitug-an si Galagar ngadto sa kapulisan nga mahimong maka paaghat usab sa ubang sakop sa NPA nga motahan sa ilang kaugalingon.
Usa sa mga programa ni PNP Chief Police General Camilo Cascolan mao ang paghunong na sa insurhensya sa Central Visayas.
Nipasalig si Ferro niadtong nagtinguha motahan nga tabangan sila nga mahatagan og panginabuhian tungod ug alang sa ilang pamilya. (AYB)