MAGLISOD na ang pamilya sa pagpadala sa lawas ni Julivyn Terante, usa sa mga suspek sa pagtulis sa JCentre Mall, sa ilang dapit sa dakbayan sa Tangub, Misamis Occidental.
Ang iyang kapuyo nga maoy modala unta lawas niini pauli sa Tangub, gidakop sa kapulisan niadtong Miyerkules sa hapon, Septiyembre 16.
Si Ailyn Gilbero, 42, kapuyo sa namatay, ug taga Barangay Bongbong, dakbayan sa Ozamis, gidakop sa kapulisan sa Mandaue City Police Office (MCPO) ug sa City Intelligence Branch (CIB) sa Cebu City Police Office (CCPO) pinasikad sa usa ka warrant of arrest sa kasong paghupot og illegal drugs.
Sud sa usa ka punerarya sa Barangay Banilad, Mandaue City siya gidakop sa mga pulis pinasikad sa warrant of arrest nga giluwatan sa usa ka korte sa Ozamis City.
Matod ni CCPO officer-in-charge Police Colonel Josefino Ligan nga nahatagan sila og kopya sa warrant of arrest ni Gilbero sa Ozamis City Police Station.
Siya dunay warrant sa kaso nga kalapasan sa Akta Republika 9165 o Comprehensive Dangerous of Drug Act of 2002 nga giluwatan ni Judge Edmundo Pintac sa Regional Trial Court Branch (RTC) Branch 15 nga gipetsahan og Hunyo 15, 2017.
Kinahanglan siyang mopiyansa og P200,000 alang sa temporaryong kagawasan.
Nakurat si Gilbero sa pagdakop kaniya kay ang gi-buy bust kaniadto mao si Terante ug wa siya masayod nga gilakip sa kaso.
Si Terante gipusil-patay sa duha ka mga tawo pipila ka mga oras human sa iyang paggawas sa bilanggoan human makapyansa sa Mandaue niadtong Lunes, Septiyembre 14, 2020.
Ang iyang lawas naa pa sa sua ka punerarya sa dakbayan. (BBT)