USA ka mamasurahay nakit-an nang wala nay kinabuhi kini human usa ka semana na nga gihilantan sa sidewalk sa dan M.C. Briones St., Barangay Guizo, dakbayan sa Mandauey niadtong Miyerkules sa alas siyete sa buntag, Septiyembre 16.
Nailhan lang ang mamasurahay nga si ‘Jhon Jhon’, gibanabana nga nagpangedaron og 25 ug anaa ra kini maghigdaan kung asa siya nakit-an nga wala nay kinabuhi.
Base sa inisyal nga imbestigasyon sa Centro Police Station, nga nakadawat sila og dead-person alarm alas 10:30 sa buntag adlawng Miyerkules ug daling girespondehan sa kapulisan.
Sigon sa mga saksi nga silang Linda Sally, 40, ug Say Lanorias, 23, mga higala ni Jhon Jhon nga usa na ka semana nga gihilantan kini ug nahibong na lang sila nga wala na kini kinabuhi.
Sa pakighinabi sa Superbalita Cebu ni Felix Suico Jr., operations head sa City Disaster Risk Reduction Management Office (CDRRMO), nga usa sa mga miresponde sa lugar nga wala nakadawat sila og report gikan sa Emergency Operations Center (EOC) kabahin sa usa ka dead person alarm.
Pagkuha nila sa patayng lawas dali kining gihatod ngadto sa Mandaue City Hospital.
Wala pa masuta nilang Suico kung unsay gikamatyan ni Jhon Jhon ug wala pa sab sila mahibawo kung aduna ba kini kalabutan sa coronavirus disease (Covid-19).
Gani, wala man sab kini nakita nga mga samad sa iyang lawas.
Dugang ni Suico nga anaa pa gihapon ang patayng lawas sa Mandaue City Hospital diin gisulod una kini sa mortuary freezer ug wala pay mga kabanay nga mikuha sa patayng lawas. (KFD)