HUMAN sila mapakyas sa ilang tinguha nga makasulod sa Western Conference Finals sa unang higayon, ang pambato sa Los Angeles Clippers nga si Paul George mituo nga walay angay usbon sa ilang lineup.
Ang Clippers duol na unta sa ilang tinguha nga maabot sa NBA Western Finals sa unang higayon sulod sa 50 ka tuig nga history sa franchise, apan gisilat sila sa Denver Nuggets sa Game 7.
Naglabaw ang Clippers, 3-1, sa ilang best-of-seven semifinals series pero nausik lang kini human sila gisurprisa sa Nuggets sa ulahing tulo ka mga duwa.
Ang Clippers mao unta ang inilog nga modaog sa NBA championship tungod sa lawom nila nga roster nga naglakip kang George, two-time NBA champion Kawhi Leonard, three-time Sixth Man of the Year Lou Williams ug reigning Sixth Man of the Year Montrezl Harrell ug Patrick Beverly.
“We like what we got,” padayag ni George. “The more we can be together, the better we’ll be. It’s year one.”
Alang kang Williams ang ilang team adunay talento nga pwedeng maabot sa championship apan nagkuwang sila sa chemistry nga mao ang nakita sa Game 7 batok sa Nuggets.
Si George miingon nga monindot ang ilang team chemistry kon motaas ang panahon nga magkuyog sila sa iyang mga teammate.
Ang All-Stars nga si Leonard ug George aduna pay nahibiling usa ka tuig nga kontrata sa Clippers sa dili pa mahimong free agent sa 2021-22 season.
Si Clippers head coach Doc Rivers miingon nga aduna siyay maayo nga team apan wala nila maabot ang ekspektasyon.
Dili kini ang unang higayon nga giusikan sa Clippers ang ilang 3-1 series lead kay nahito napud kini niadtong 2015 batok sa Houston Rockets ubos gihapon sa pagdumala ni Rivers. (RSC)