MOIHAP sa 300 ka mga laptop ang ipanghatag ngadto sa mga estudyante sa junior ug senior public high school alang sa ilang online classes.
Kini maoy usa sa mga proyekto sa lokal nga kagamhanan sa Davao City sa tumong nga makatabang sa kabataan nga naglisud gayod nga makapalit og laptop.
Kabahin kini sa "Student Siblings' Laptop Sharing Project," usa ka espesyal nga protekto ni Mayor Sara Duterte-Carpio uban sa Consulate General sa People's Republic of China dinhi sa siyudad.
Gikan sa mga "poorest of the poor" nga pamilya ug kadtong mga solo parent ug ang mga namuyo sa mga pobre nga guardians ang makahimulos niini.
Sumala ni Norman Baloro, spokesperson niini nga special project, nagbutyag nga ang interesado nga mga estudyante mag-send lamang og email kanila sa specialprojects.davaocitygov@gmail.com aron ma-download ang application forms nga ibutang lang sa designated dropbox gawas sa Pasalubong Center tapad sa People's Park.
Mga forms kinahanglan masumite gikan Septyembre 21-23, 2020 gikan sa 8:00 sa buntag ngadto na sa 3:00 sa hapon.
Giingon ni Baloro nga prayoridad sa mahatagan mao kadtong mga namuyo sa Toril Proper, Buhangin Proper, Bunawan Proper, ug mga barangays ubos sa Poblacion ug Agdao District gumikan kini gayod ang mga lugar nga dunay elektrisidad ug internet connections.
Giingon sa opisyal nga 300 ka mga qualified ang makadawat sa laptop nga pangayoan og mga requirements nga anaa na-post sa Facebook Page sa Eskwela Davao.
"We will get and generate the names and we will find those who need it most, especially those who are less fortunate. According to Neda (National Economic and Development Authority), a family can be considered poor when a family of six persons only has P12,577 monthly income," ingon ni Baloro.
Sulti ni Baloro nga kadtong mga pupils ug mga students nga anaa na sa scholarship programs and assistance sama sa Eskwela Davao, Step scholarship, Ched-LGU Tulong Dunong Program dili na mamahimong ma-qualified sa Laptop Sharing Project.