COTABATO CITY -- Sakmit sa mga awtoridad ang usa ka kilo nga shabu sa gilusad nga anti-drug operation sa Philippine Drug Enforcement Unit (PDEA) sa Bangsamoro Autonomous Region in Muslim Mindanao (Barmm) alas 2:25 sa hapon niadtong Huwebes.
Atol sa operasyon, sikop ang 2 ka kanhi municipal councilor samtang ang usa incumbent sa Tagoloan, Lanao del Sur. Naila ang mga dinakpan nga sila si Esnaira Sultan Capal alyas Nai, Pangcopa Hadji Salik alyas Peping, ug ang incumbent nga si Simpanor Capal Salic ug lain pang kauban nga si Rodrigo Sequino alyas Jojo.
Gibutyag ni PDEA-Barmm Director Juvinal Azurin nga gihimo ang buy-bust sa may national highway sa Purok 4, Barangay Matampay, Marawi City, uban ang hiniusang puwersa sa nagkadaiyang yunit sa kapulisan ug kasundalohan.
Sa diha nga akto na nga gitunol sa mga suspek ngadto sa PDEA-asset ang druga, giambakan gilayon sila ug giposasan.
Narekober gikan sa mga suspek ang usa ka kilo nga shabu nga kantidad og P6.8 milyon, 3 cellphone, mga identification cards, kolor puti nga Toyota Hilux pick-up nga dunay plaka nga NBT-7566, kolor itom nga Toyota Fortuner nga dunay plaka nga DAN-1108, buy-bust money ug duha ka official receipt (OR) ug certification of registration (CR) sa duha ka sakyanan.
Nasayran gikan kang Azurin nga dugay na diay nga giukoy ang mga suspek nga nalambigit sa large scale illegal drug trade sa probinsiya ug kasikbit niini nga Lanao del Norte, lakip na sa mga siyudad sa Marawi ug Iligan.
Mga suspek gibalhog sa prisohan ug gitakda nga pasakaan og kaso nga kalapasan sa Republic Act 9165 o Comprehensive Dangerous Drug Act 2002. (Edgar E. Fuerzas)