TUNGOD sa nakitang pagsaka sa mga kaso sa nagpositibong sa coronavirus disease (Covid-19) sa lungsod sa Consolacion, gipasabot sa municipal health officer (HMO) sa lungsod nga ang nabatyagan nga pagsaka sa kaso subay sa kasamtangang gipahigayon nga expanded targeted testing (ETT).
Gibutyag ni Dr. Fe Pardillo, MHO sa lungsod, nga ang maong mga kaso resulta sa pagpaubos sa swab test sa mga empleyado sa munisipyo, mga barangay workers, mga kapulisan, kabomberohan, taga Jail officers, health workers ug uban pa.
Niabot na sa ikatulog hugna ang pagsulay sa lungsod diin nakapa swab ang moabot 972 ka mga empleyado.
“Mas nahibaw-an nato kung kinsa ang mga positibo ug ato dayon sila nga ma isolate, ato lang giawhag ang publiko nga dili mabalaka sa pagsaka sa kaso,” matod ni Dr. Pardillo.
Dugang sa doktor nga sagad sa mga nag positibo mga asymptomatic o kadtong walau gipamati nga simtomas sa Covid-19.
“Mao nga importante gayud ang mag-face mask, maglagyo ug likayan ang tapoktapok, mga inum-inum kay usa ra may baso. Kung panahon sa tingkaon, mas maayo ug lagyo gamay kay unprotected naman ta,” dugan ni Pardillo.
Nagsugod ang labing unang hugna sa targeted testing sa Septiyembre 11 diin gi-target ang 500 ka empleyado nga unang ma-swab test.
Kini nunot sa tinguha ni Consolacion Mayor Joannes “Joyjoy” Alegado nga mahimong Covid-free ang mga nagtrabaho sa munisipyo.
Sa kinatibuk-ang ihap sa Septiyembre 17, niabot na sa 533 ang positibong kaso sa covid, 46 ang aktibo, 452 na ang nakarecover ug 35 na ang namatay. (ANV)