MOHATAG og ayuda ang Cebu City Government ngadto sa mga mag-uuma sa dakbayan kansang produkto sa agrikuktura nadanyos gumikan sa grabeng bunok sa uwan niadtong Septiyembre 15 ug 16, 2020.
Si Mayor Edgardo Labella mopatawag og tigom sa City Agriculture Department (CAR), City Disaster Risk Reduction and Management Office (CDRRMO), Department of Social Welfare and Services (DSWS), Department of Engineering and Public Works (DEPW) ug City Administrator para hisgotan unsa nha matang sa tabang ang itunol ngadto sa mga mag-uuma.
Apan si Labella nibutyag nga sama sa nasunogan, ilang nahiaguman ang bangis sa kalamidad sa uwan o baha hinungdan nga sa iyang tan-aw mohaom sila sa tag P20,000 o P10,000 nga financial assistance depende sa danyos.
“Atong tan awon unsaon paghatag og assistance ug sa displaced farmers unya tan awon nato pag-rehabilitate anang area-ha at the same time give assistance because they are victims of calamities,” padayag sa mayor.
Giapil ni Labella ang DEPW isip preparasyon kon pananglit adunay mga dalan nga naguba para ma-rehabilitate dayon aron dili masakripisyo ang mga molupyo nga moagi sa maong lugar.
Ang barangay Mabini, nirehistro og kapin P3 milyones nga damages sa manggahan nga nagbuwak ug kadtong nagdala na og bunga.
Ang uwan nakamugna og mga pagdahili sa yuta nga niapekto sa mga balay sa 7 ka mga barangay sa dakbayan ug baha sa barangay Tisa ug Pardo areas kansang tubig niabot saylo sa hawak. (PAC)