SUPERBALITA CEBU

2 ka marshals sa Lapu positibo sa gidiling druga

NAG POSITIBO sa paggamit ug ginadiling drugas ang duha ka mga sakop sa marshal sa Lapu-Lapu City Hall sa gipahigayong kinalit nga drug test nga gipasiugdahan sa City of Lapu-Lapu Office of Substance Abused and Prevention (C-Losap) niadtong Septiyembre 17, Huwebes.

Moabot sa 35 ka mga marshal sa kagamhanan ang gipaubos sa naasoyng drug test.

Ang mga marshal maoy gitahasan sa kagamhanan sa pagbantay sa city hall hilabi na kalabot sa seguridad.

Matod sa pangulo sa C-Losap, Garry Lao, ang duha ka nagpositibo maoy ikaduha nga higayon nga sila nagpositibo sa kinalit nga drug test.

Gitangtang sila sa trabaho kaniadto apan nipaubos sa rehabilitation program sa C-Losap sulod sa pipila ka buwan hangtod nga gitagaan ug laing tsansa sa makabalik ug trabaho sa kagamhanan.

Apan karon nga nagpositibo na usab sila hayan di na sila mahimong makabalik pa sa trabaho.

Adunay 4 ka mga marshal nga wala makatunga sa drug test apan nasayran nga gibalhin na diay sila sa Material Recovery Facility (MRF) hinungdan nga wala na silay tulubagon kalabot niini.

“No more chance na what’s the purpose nga mo-undergo na sab ug laing rehab kung ni-undergo na sila ug rehab niya na-rehab na man na sila unya wa man gihapon nibalik man gihapon so wala na,” matod ni Lao.

Dugang ni Lao nga ang tuyo unta niya nga ipaubos sa drug test mao lamang ang mga sakop sa City Traffic Management System (CTMS) apan si Lapu-Lapu City Mayor Junard Chan ang misugyot nga iapil ang mga marshal sa city hall.

Wala hinuoy nagpositibo sa moabot 119 ka sakop sa CTMS.

Subling gipahimangnoan ni Lao ang mga kawani sa dakbayan nga padayon silang mopahigayon og drug test.

“Basin nagtuo sila nga relax ra kaayo ta kay nag ECQ ta unya nag GCQ hangtod nga MGCQ basin nagtuo sila nga wala na ta magpakabana,” matod ni Lao. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph