ANG Police Regional Office 7 (PRO) motabang sa Philippine Drug Enforcement Agency (PDEA) 7 sa pagpangita niadtong mga nagpailang ahente sa PDEA nga manakop sa drug personalities apan dalhon sa laing lugar diin didto tulison ug buhian ra usab dayon.
Giangkon ni Police Brigadier General Albert Ignatius Ferro, direktor sa PRO 7, nga wala pa siya maka dawat sa report nga adunay magpaila nga mga ahente sa PDEA 7 ug manakop niadtong mga drug suspect apan buhian ra usab kini dayon kung makuha na ang kuwarta ug mga butang.
Matod sa heneral nga usa kini ka maka alarma nga hitabo nga angayan nga sulbaron sa labing dali nga panahon.
Tungod niini, misaad si Ferro nga motabang sila sa PDEA-7 sa pagpangita sa maong grupo sa mga tulisan ug ilang pasakaan og kaso kung kini madakpan lakip na kadtong drug personalities nga padayon sa illegal nga negosyo.
“Actually with that kind of information is a bit alarming, but we’ll help PDEA and check this particular information and will bring to justice those that involve with illegal drug transaction," matod ni Ferro.
Una nang mi butyag si PDEA-7 Director Levi Ortiz nga nagtuo sila nga mga robbery gang ang naghimo niini diin gidala ang pangalan sa ilang ahensya.
Kung dili kini mahatagan og pagtagad, matod ni Ortiz, madaot ang ilang organisasyon niining maong bag-ong modus sa mga tulisan.
Wala motug-an si Ortiz kung asa dapit sa siyudad nahitabo ang pagdagit sa usa ka drug personality sa nagpailang PDEA agent ug gibuhian ra usab human makuha ang kwarta ug mga butang niini.
Ning pagsulod na sa ber months dako ang posibilidad matod ni Ferro nga mosaka ang kaso sa tulis diin ang target mao ang money institutions sama sa pawnshops, bangko, tindahan ug ubang mga establisamento.
Gumikan niini gimandoan karon sa PRO-7 director ang tanang city ug provincial police office directors nga ilang hingusgan ang intelligence monitoring batok sa robbery gangs gikan sa mga siligang rehiyon.
Hinuon, nagpadayon ang quarantine checkpoints busa mag lisud ang mga tulisan nga makasulod sa Sugbo. (AYB)