2 ka bata nalanag, patay

DARAM, Samar - Duha ka bata ang namatay gumikan sa pagkalanag sa gikaon nga tahong didto sa Barangay Bagacay, lungsod sa Daram, Samar.

Base sa imbestigasyon sa Bureau of Fisheries and Aquatic Resources (BFAR), ang unom ka sakop sa usa ka pamilya nakasinati og pagpamanhud, sakit sa pus-on, pagsuka ug lisud sa pag ginhawa.

Gidala sila sa Catbalogan Doctors Hospital, alas 11:30 sa gabie, sa miaging adlaw.

Sa unom ka sakop sa pamilya nga gidala sa tambalanan, duha ang nabugtoan sa kinabuhi nga nag edad og 3 ug 8 anyos, pulos mga lalake.

Dugang sa imbestigasyon, ang pamilya nangaon og tahong nga kinuha sa ila ra sab barangay sa una pa nakasinati sa naasoyng sintomas.

Gikuhaan dayun sa BFAR og seawater ug shellfish sample ang lugar diin nakuha ang tahong aron ipaubos sa confirmatory test sa BFAR National Fisheries Laboratory Division.

Ang BFAR miabiso sa publiko nga dili una manguha ug manginhas og bisan unsang kinhason ug alamang sa Daram mentras gipaabot pa ang resulta sa test.

Ang Daram usa sa mga lugar nga gimonitor sa BFAR ug negatibo kini sa red tide sa miaging mga semana.

Ang mga lugar nga positibo sa red tide mao ang Cancabato Bay, Matarinao Bay - General MacArthur, Hernani, Quinapondan ug Salcedo sa Eastern Samar.

Lakip usan ang Carigara Bay - Babatngon, San Miguel, Barugo, Carigara, ug Capoocan Leyte.

Naa usab red tide sa kabaybayonan sa Guiuan sa Eastern Samar ug Iriong-irong Bay - Catbalogan, Samar.

Apektado usab ang San Pedro Bay sa Basey, Samar. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph