NING nagsingabot nga pagsaulog sa Cebu Press Freedom Week (Septiyembre 20-26), sa unang higayon, ang mga opisyal sa Globe Telecom nakigkumustahan sa editors ug staff writers/reporters sa SunStar Cebu ug Superbalita Cebu pinaagi sa teleconference sa Zoom app kagahapon sa hapon, Septiyembre 18, nga gidumala sa public relations company nga PRWorks.
Gipanglantawan na kini kaniadto nga kalamboan sa press relations apan, kalit nga gipatuman karon mugna sa coronavirus disease 2010 (Covid-19) sa pagminus sa pisikal nga panagtapok o pagtuman sa hugot nga lagda sa social distancing tungod sa nagpadayong hulga sa naasoy nga pandemiya ug samtang wala pay bakona nga gipaabot sa bag-ong normal nga kinabuhi.
Ug alegre ang Kumustahan sa Globe tungod sa online nga duwa, electronic raffle draws ug ang premyo gipaagi sa G-Cash nga usa ka mobile money service online sa Globe nga naghimo sa smartphone nga virtual wallet. Dugay pagkaon nga gidalit.
Si Yoly Crisanto, Senior VP for Communications and Global Chief Sustainability Officer sa Globe, nitambong sa telecomference gikan sa kaulohan, subling nipaambit sa tinguha sa Globe nga paspas ug kasalingang koneksiyon sa nasod sa internet uban sa pag-ila nga kini ang bag-ong gikinahanglan sa panahon alang sa kalamboan. Gipasabot niya nga ang internet kabahin na o panginahanglan sa tanang aspeto sa pagpakabuhi sa digital nga henerasyon.
Usa sa iyang nakita nga positibo sa pandemiya mao ang paspas nga pag-edukar sa katawhan sa online technology, diin taudtaod na nga ilang giduso ug gipaila sa nasod apan hinay ang reaksiyon sa publiko. Karon, ang tanan nag-apas gikan sa natad sa edukasyon ngadto sa ekonomiya.
Salamat sa Globe Telecom, misutoy nga negosyo panahon sa pandemiya, nga nipaambit sa ilang grasya ngadto sa usa sa mga labing apektado sa digitalisasyon sa komunikasyon ug pandemiya--ang tradisyonal nga mantalaan o media.