Dear Noy Kulas,
Good day nimo. Usa ko sa imong followers. Tawga lang ko og Virgo.
Ang akong problema mao ang akong relationship sa usa ka gay. Close friends mi niya sukad sa college pa mi hangtod naminyo na lang ko. Siya ang akong sumbonganan sa tanan nakong problema. Ako sab ang iyang sumbongan sa tanan niyang mga problema. Until nga niabot ang time nga na develop ang among feeling. Uyab na mi.
Ang among pamilya wa makahibawo nga naa mi relasyon kay naanad na sila namong duha. Kon manglakaw mi bisan mabuntagan way magduda kay naanad na lagi sila namo. Hangtod niabot na mi sa time nga nag sex bisan karon nga nag quarantine. Ako may moadto sa ilang balay ug magdulog mi sa ilang kwarto.
Ang akong naproblemahan kay mabdos ko karon ug nagduda ko siya ang amahan kay kadaghan na mi mag sex sa akong bana, wa na man ko momabdos. Nalipay ang akong bana ug siya, pero ako mismo nagduha-duha kon kinsa ang amahan. Nakonsensya na baya ko sa akong pamilya, pero love na namo ang usag usa.
Noy, unsa ang among buhaton karon? Magtaban kaha mi? Anyway, wa man mi anak sa akong bana. Mabuhi ra ko nga wa siya kay maayo man mi og trabaho. Unsay imong tan-aw?
VIRGO
Virgo,
Nganong imo mang biyaan ang imong bana? Tungod kay nahigugma ka sa bayot nimong higala? Kasado man mong duha ug wa may problema ang inyong kaminyuon kay wa man kaha siyay bisyo ug nagkasinabot ra man kaha mong duha? Kana bang wa moy awayan ug uban pa.
Ikaw ra ang nag create og problema kay nitugot man ka nga magkarelasyon mo sa imong amigong bayot pinaagi sa paggahin og panahon uban kaniya. Mas gihatagan mo siya og taas nga panahon kay sa imong bana hinungdan nga ingon na niana ang dagan karon sa imong pagbati.
Kinsa man ang amahan nianang gisabak, ayaw na lang na huna-hunaa. Balik sa imong closeness tali sa imong bana no matter siya ang amahan o di. Kamo man ang gikasal, di ang bayot.
NOY KULAS