MAG TIGI sa P34,000 nga ganti ang chess players sa ikapito nga hugna sa Stay at Home Online Chess Challenge (Team Battle) karong Oktubre 17 ug 18, 2020 sa lichess.org.
Ang torneyo, nga gi-organisar ni International Master Kim Yap, usa ka team competition ug ekslusibo lang kini alang sa mga Sugbuanon o Cebu-based nga chess players.
Ang kada team kinahanglan og tulo ka players nga adunay average rating nga dili molapas sa 2050 sa National Chess Federation of the Philippines (NCFP).
Ang unrated players hatagan og 1800 nga rating alang sa pagkuwenta sa team average rating.
Adunay limit nga 50 ka teams ang pwedeng makaapil sa torneyo.
Bahinon sa lima ka brackets ang mga partisipante alang sa elimination round.
Ang Top 2 sa ilang bracket maoy makasulod sa final round samtang ang top 10 teams mao ang magtigi alang sa titulo inig ka Oktubre 18, 2020.
Ang kampiyon makadawat og P9,000, samtang P6,000 sa ikaduhang luna, P3,000 sa ikatulong luna ug P1,500 taga-usa sa ikaupat ug ikalimang luna.
Ang makakompleto sa Top 15 makadawat og P600 nga consolation prize.
Mohatag pud og special prize ang maong torneyo. Ang kampiyon sa Female, Top Kiddies ug Senior makadawat og P500 matag-usa.
Mohatag pud og giveaway alang sa viewers ug non-viewers sa raffle draw.
Ang registration fee anaa sa P300 taga team samtang ang late registration nga lapas sa Oktubre 14 anaa na sa P500.
Ang maong torneyo gi sponsoran sa Chess Infinitum Inc. ubos sa pagdumala sa ilang presidenti nga si Benjamin “Boojie” Lim. (RSC)