BUG-AT nga silot ang ipahamtang sa Philippine Basketball Association (PBA) ngadto sa mga makasupak sa lagda nga ipatuman inig balik sa aksyon sa liga pinaagi sa bubble concept.
Ang PBA bubble gikatakdang sugdan karong Oktubre 9, 2020 sa Angeles University Foundation (AUF) Gym sa Clark City sa Angeles, Pampanga.
Sa dili pa sugdan ang kompetisyon, ang tanang 12 ka teams mopuyo na sa Clark City karong Septiyembre 26, 2020 aron tiwason ang ilang training.
Gikinahanglang naa sa kondisyon ang mga magduduwa una kini mohamag sa aktuwal nga kompetisyon.
“We’re ready and we’re excited,” matod ni PBA board chairman Ricky Vargas nga napatik sa www.pba.ph.
“If we can start tomorrow, we would start tomorrow. The Commissioner’s Office has done a good job with the plans, and they’re ready to execute as soon as we’re given the go-signal.”
Ang mga magduduwa nga mosupak sa health protocols kuhaan og usa ka buwan nga suweldo sa ilang tagsatagsa ka mother team ug pamultahon sab kini sa PBA og P100,000.
Gawas niini, mopahamtang sab ang liga og lima ka mga duwa nga suspensyon nga ipatuman sa sunod season.
“Kapag lumabas ka ng bubble, one month kang hindi papa-swelduhin ng team, fine ka sa PBA ng P100,000. Tapos sa susunod na season, suspended ka ng five playing games,” asoy ni commissioner Willie Marcial.
“Kapag pumasok ka, wala ng makakalabas sa bubble.”
Nagkanayon si board vice chairman Bobby Rosales sa Terra Firma nga kinahanglang estriktuhon ang pagpatuman sa mga lagda sulod sa bubble aron maseguro ang kaluwasan sa tanang mga nahilambigit.
“Violations will be dealt with accordingly by the Office of the Commissioner and their respective teams,” batbat ni Rosales.
“What is important here is that we have looked, studied, and reviewed the bubble protocols that we intend to implement and we really expect strict compliance with the bubble.”
Ang tanang teams mopuyo sa Quest Hotel nga mga 10 minutos ra ang gilay-on sa AUF Gym.
Nahunong ang operasyon sa PBA niadtong Marso, 2020 gumikan sa pagkuyanap sa coronavirus disease 2019 (Covid-19).
Atol sa pagkahunong, usa ra ka duwa ang napahigayon sa Philippine Cup. (ESL)