PAMPANGA

Garcia: Masayang Aldobeytan king Banwa—Tagana? (Happy Birthday in Heaven—Really?)

Kapisik

“Nanu wari ing panakitan ning tau nung atubu ne ing mabilug a yatu,

dapot abating ne ing kayang kaladwa?

O nanu ing ibye nang kapalit ning tau kapalit ning kaladwa na?

~ MateuǀDangka 16: Sunis 26

(Matthew 16:26)

“Nung ninung mikasala ya ing mate.

Ing supling e ne kadake ning sala ning pengari,

o ing pengari kadake ya king sala ning supling.

Ing katalarwan ding matalaru mipakilala a karela,

at ing karawakan ding marok masingil laban karela.”

~EsekyelǀDangka 18: Sunis 20

(Ezekiel18:20)

“Nwan ya ing lalakbang

a e lalakad karing agnan ding mangarok

o salabat karing makasalanan

o lukluk siping da ring magmulang.

dapot ing tula da ati king batas ning Ginu,

at magbule-bule king batas na aldo/t bengi.

Ing taung ita mengari yang impun a mitanam king agus ning danum,

a mamunga king kapanaunan

at ing bulung na e malalanat—

nanu mang daptan da misasaplala.

Ding mangarawak e antita!

mengari lang apa

a lalabulan ning angin.

Inya sa’t ding mangarawak e la tikdo king pamanukum,

o ding makasalanan king samak ding matalaru.

Uling ing Ginu magbante ya king dalan ding matalaru,

dapot ding mangarawak paynturu la king pangalasak.”

~DalitǀDangka 1: Sunis 1-16

(Psalm 1:1-6)

***

Balang ating mag-masusing aldobeytan ngeni tambing dang susulat ding kamaganak da—“Maligayang Aldobeytan king Banwa!” ngara. Bala namung aldo manakit kang antita kareng social media lakwas na keng Facebook. Megi nang senayan ita o bayung gawi da reng memalen ning social media. At ala pang mekasuri ata o mangutang mu man nung ita makatud sabyan—“Maligayang ALdobeytan king Banwa!”

Ala pang linto o sinabing “Maligayang Aldobeytan king Pugatoryu” o“...king Impyernu.” Oneng asaan ta na ita uling balang metung o keraklan kekatamu buri tamu miras ta ligaya banwa at pati na deng sablang pakamalan tamu ngan. At sumangid na naman nita deng kasalang at pikakasaman tamu miras no man keng bubukal a dapug ning larung alang-angga. E naman sabla. Deta mung sari kamwa kareng kasalang da.

Makanyan man, wangis ning “Happy Birthday to me” at ing “Happy Birthday in Heaven” akakagaywan da na reng keraklan at keraklan mu naman tatanggapan da na naman. O’t e la kaya makapanayang atin sumabi karelang”Happy Birthday to you”?

Mibalik ta’keng “Maligayang Aldobeytan king Banwa”–agpang pin karing sunis a minuna na–e balang meyangu-bye miraras tambing king ligaya banwa. Panupaya dapot ita ing makasulat karing Banal a Kasulatan at e na kidta mu kabud ning Kapisik.

Ninu ta’wari ing e bisang ding pakamalan dang meyangu na bye miras la king ligaya banwa? Ala, ne abe. Dapot e antita kamura ing pamamunta banwa anti king e anti ta kamura ing pangabaldug ta keti labwad ating kamatayan.

Pinili tamu ing miras king labwad ayni a pangsaguli at pangsaguli ngan ing segana-gana. E na katamu kabud bildug ning Apung Ginu keni. Pignasan tang mabayat at sari kalalam inya miras ta’keti yatu ning kamatayan.Pasya tamu ing miras ta’keti.

Anti kanita, nung magpasya tamung mibalik king kayaryan ning Dyos at daptan tamu ing sablang bage bang miyuli tamu karin—makayuli tamu ngan kabud daptan tamu ngan ing makatud a sablang dapat daptan ba’ta’ng makauli karin.

Kanita malyari ta nang sabyan ing “Happy Birthday to me in Heaven!”

***

Dake Talabaldugan:

1. lulót (panguri) lulut, malulut, ibat na king pangabubut, e na sagiwa. English - ripe, over ripe. Alimbawa king pamangamit: “Lulut la keng impun deng asali ming mangga inya asno kanyaman yumu at asno dayu lasa kareng kinalburu.”

2. luma (panguri) megisan na, kepaltan na, kupas na. English - ran out, exhausted, depleted, dissipated. Alimbawa king pamangamit: “Luma na ka marine nung panakawanan mo ring sarili mung pengari o kapatad ksing ila na kabud pagkabye ra.”

3. lum๠(panguri) laon/laun, matwa na, malambat na. English - old, not new anymore, used, second-hand. Alimbawa king pamangamit: “Agyang kanung misulud kang luma at makaladwa buri nang sabyan nita bandi meng tagana ing susulud mu, nganang Paing.”

4. lumಠ(panguri) sadya, minuna, milabas, lakwas maranun, miyalilan, milibayan. English - former, previous, earlier, past, ex, preceding, antecedent, erstwhile, foregoing, anterior. Alimbawa king pamangamit: “Agyang manyaman ing lutu nang Edyuk, pantunan ku pa mu rin ing lumanang lutung Darang Rusing agyang malambat ku nang e na atatakman.”

5.lumanay (palagyu) lumane, banayad/kabanayaran. English - mildness, gentleness, mellowness. Alimbawa king pamangamit: “E kabud mu akakwa ing pansing ding aliwa king sikan ning siwala o gulisak nung e king lumane at lino ning pamagsalita.”

***

SADYANG GAWI DA RENG KAPAMPANGAN

Ing sabi da reng mangatwa kanita, deng kanung butuki o lupisak–mangadi la neng sisilim o itang penandit nung nu ing awsan dang “orasyun” o pamangadi neng bayu yang albug ing aldo gagawan da reng pamilya karing sibabale. Tutu pin naman a deting lupisak akit mu lang kukuldas manibat karing bale o tanaman bang tuklu keng gabun at bala mumuma la keng gabun anti keng gagawan da reng tau neng duruku la anting pamanyamba keng Apung Ginu lakwas na neng Station of the Cross kanita. E da na naman gagawan ita ngeni deng tatagun keng stasyun.

Ing kapanwalang iti e na madaramdam keng kasalungsungan at bina na mu namang mekalingwan kambe ning pamanigtig ding batingo o kumpana keng pismaban neng ka-anam ning bengi bang deng tau–nanu man ing gagawan da ibili da bang makiyagnan keng pamangadi king awsan da kanitang “Orasyun Pambengi.”

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan—ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph