GIMAKMAK, gidabodabohan sa Los Angeles Lakers ang mapangahason nga Denver Nuggets 126-114 aron angkunon ang game 1, sa best of seven sa Western Conference finals sa NBA.
Ang Lakers dili na mosugot nga madehado sila sa game 1 sama sa nahitabo sa 1st ug 2nd round sa playoffs diin giunhan sila sa Portland Trail Blazers ug Houston Rockets.
Apan sa WCF, gisiguro nilang superstar duo Anthony Davis ug Lebron James aron dili mabutang sa alanganin ang ilang kuponan.
Si Davis ug James nimugna og double- doubles diin 37 puntos ug 10 rebounds ug 15 puntos ug 12 assists matag usa.
Kon hinay ang ilang arangkada sa duha ka round sa playoffs, sa WCF nilabaw dayon og double digit ang Lakers pagkahuman sa 1st half ug ilang gimintinar hangtod sa ikatulong quarter.
Si Kentavious Caldwell-Pope niamot og 18 points samtang si Dwight Howard nidugang og Nuggets tos atol sa ilang pagbalik sa WCF sa labing unang higayon sulod sa 1 ka dekada.
Ang team ni LeBron niharos sa nagsunod nga upat kaduwa atol sa una ug ikaduha nga round sa playoffs.
Si Nikola Jokic ug Jamal Murray pulos nibugwak og tag 21 puntos para sa pilderong Nuggets, kinsa nakabalik sa WCF sukad niadtong tuig 2009 diin gipilde sila sa Lakers niadtong panahona.
Grabe ang giagian sa Nuggets sa wala pa nila nakontra ang Lakera sanglit kaduha sila nalubong og 1-3 batok sa Utah Jazz ug Los Angeles Clippers.
Sa game 1 sa WCF, dehado na usab ang Nuggets dihang si Jokic ug Murray kinsa nakakuha dayon sa ilang 3 ka personal foul sa 1st half ug nagkaproblema na sila sila sa 2nd half.
Ang game 2 ipahigayon ugmang adlawa, Lunes, Septiyembre 21, 2020.
Si Davis nibahog dayon og 14 puntos sa 1st quarter apan ang Nuggets nipasulod og 64% sa ilang mga tira diin napasulod ni Murray ang iyang tres dihang napupos na ang oras para idikit ang score 38-36.
Si Alex Caruso nipasulod sa iyang tres aron ablihan ang 17-1 run nga Lakers pagsugod sa second quarter aron inaton ang ilang labaw 53-39.
Sukad niadto nakontrolar na gyud sa Lakers ang duwa hangtod sa katapusang segundo sa 4th quarter. (PAC)