PBA mogasto og P65 milyones

SUNDON sa Philippine Basketball Association ang sistema sa pagpadayon sa duwa sama sa National Basketball Association apan nagtangag kini og dako nga kantidad.

Si PBA Board chairman Ricky Vargas nagkanayon nga kinahangkan nga mogasto og P65 milyones para sa PBA bubble para makasugod ang PBA sa ilang season didto sa New Clark City Angeles sa Pampanga.

Sa niaging mga semana,ang Board ug si Commissioner Willie Marcial nagdumili paghatag og banabana kon pila ang gastuhon sa PBA para mahisama sa sistema sa NBA didto sa Walt Disney sa Orlando Florida.

“The commissioner has always stayed away from that question. But I’ll tell you, it’s close to P65 million that will cost us,” padayag ni Vargas.

Ang board chairman nagkanayon nga kinahanglang gastohan og dako sa PBA ang bubble para lang makabalik og duwa ang mga player aron malingaw ang mga fans.

Gitinguha sa Games and Amusement Board nga masiguro ang kaluwasan sa mga players ug pipila ka mga tumatan-aw ug klaruhon nga ang tanan nilang lakang mahisunod sa mga lagda sa Inter Agency Task Force aron malikayan ang pagtakboy sa Coronavirus Disease.

Ang PBA nagtinguha nga makasugod sila sa ilang sunod season karong Oktubre 9, 2020 diin salmotan kini sa 12 ka mga teams. (PAC)