ORIGINAL post kini ni Jimmy Templa sa iyang Facebook account nga ‘Memories of Old Cebu’. Ako lang gi-edit gamay kay taas ra kaayo og aron mohaum usab sa akong naagian sa niadtong bata pa ko didto sa akong yutang natawhan sa Mindanao ug sa ubang mga pareho nako og pangidaron nga nagtubo usab sa probinsiya.
Siguro nagtubo sa siyudad si Ginoong Templa mao nga wala usab niya masinati ang kinabuhi sa mga bata niadtong nanglabay’ng panahon nga nagtubo sa baryo o probinsiya. Tinuod bitaw, pagkanindot ug pagkatam-is balikan ang kagahapon. Daghan ang maka-relate ani.
Niadtong bata pa ta, panahon nga walay klase, maligo sa sapa ug dagat. Kon ting-ulan, mangaligo usab sa ulan nga maghubo. Pobre og kagikan apan malipayon. Kontento na kon unsa may naa. Niadtong maong mga panahona, kon aduna na kay refrigerator ug radyo puno ug television set nga kahoy, abre-abre ang pultahan, aw, adunahan na ka. Walay gadget, walay mga fast food chain sama sa Jollibee ug Mc Donalds. Lutong bahay gyud ang kan-on. Niluto ni Nanay. Walay madaog-daog nga sud-an kon dili ginamos, tinap-anan, utan ug tinabal ra gyud.
Didto sa probinsiya, ang mga batan-on motabang gyud sa trabaho sa ilang mga ginikanan sama sa pagdaro sa basakan, pagtanom sa humay ug mais. Manguha og kumpay para ipakaon sa mga hayupan, kabaw, kabayo, baka ug kanding. Lubok og bani sa saging sagulan og tahup para lawog sa baboy. Lubok sab og humay, maglubo ug galing og mais para pagkaon. Ang galingan bato nga tuyok-tuyokon. Kon ting-snacks na, kaon lang og tinughong (bahaw nga butangan og tubig ug kamay maskubado dayon initon), maruya ug pritong saging. Kon makasala, bunalan og bakus sa among tatay ug kagingking sa among nanay.
Makaduwa mi kon humana ang mga trabaho sa balay. Ang mga duwa, siyatong, tubig-tubig, bato-lata, lastiko, holen ug tago-tago. Gubat-gubat sa luthang ug tirador. Usahay manirador og manok sa silingan. Radyo lang gyud ang kalingawan. Malingaw kon makapaminaw sa mga drama sa radyo sama sa Diego Salvador, Maria Flor de Luna, Ikaw, Ako ug ang Awit, Handumanan sa Usa ka Awit, Manok ni San Pedro, Gabii na Kumander ug daghan pa. (bobbygnalzaro@gmail.com)