TALANDUGON ang kahimtang sa usa ka lalakeng menor de edad human siya gipusil samtang natulog Sabado sa ala 1 sa kaadlawon, Septiyembre 19, 2020 sa Sitio Upper Maraat, Brgy. Sto. Niño, Dakbayan sa Toledo.
Si Romar Zafra Toquero samdam sa iyang tiyan human gipusil sa wala mailhing gunman.
Si Police Staff Sergeant Alexander Consul sa Toledo Police Station nga nahinabi sa Superbalita Cebu nagkanayon nga si Toquero gikatahong natulog sa lantay gawas sa balay sa iyang apuhan.
Apan kalit na lang nabulabog ang ilang paghinanok dihang mipaka ang sipang buto sa armas.
Sa ilang pagsusi, ilang nakaplagan si Toquero nga nagkadugo na ug nangayog abag.
Gibutyag ni Consul nga way nakakita sa pagpamusil sanglit mingaw na ang palibot atol sa kremin.
Matod pa ni Consul nga sila nagtuo nga dunay mas lawom nga motibo sa kremin.
Wa nila isalikway nga si Toquero dunay gikaatraso sa maong lugar.
Sumala pa ni Consul nga ang maong lugar dunay problima sa ginadiling drugas.
Ang biktima nadali sa pagdala sa tambalanan sa lungsod sa Balamban, subay ning pagsuwat gikatakdang dalhon sa tambalanan sa dakbayan sa Sugbo. (GPL)