DUL-AN sa 4,000 ka bag-ong mga kaso sa coronavirus disease (Covid-19) ang natala sa 24 oras ug dugang 100 ka mga pasyente ang nangamatay sa mao nga sakit, matod sa Department of Health (DOH) sa Sabado, Septiyembre 19, 2020.
Ang DOH, sa iyang alas 4 sa Sabado sa hapon nga bulletin, niingon nga 3,962 ka dugang mga kaso ang natala sa nasod, nga nidala sa kinatibuk-ang gidaghanon ngadto sa 283,460.
Mayoriya sa mga kaso nagagikan sa National Capital Region (NCR) nga dunay 1,440.
Laing taas og mga kaso mao ang Bulacan (354), Cavite (287), Laguna (222) ug Batangas (213).
Ang 100 nga nangamatay sa Sabado nihatod sa kinatibuk-ang gidaghanon sa patay sa nasod ngadto sa 4,930.
Ang DOH niingon nga mayoriya sa nangamatay natala sa NCR nga dunay 52.
Laing nangamatay gitaho sa Calabarzon (14) ug Western Visayas (10).
Sa gidaghanon sa mga tawo nga naka recover gikan sa Covid-10, ang DOH niingon nga dunay bag-ong nangaayo nga 1,128 nga natala. Kini nidala sa gidaghanon sa recoveries ngadto sa 209,885.
Taliwa sa padayong pagsaka sa mga kaso sa Covid-19, ang DOH niingon nga kinahanglan nga ang publiko di mokompyansa.
“While we have seen improvements in our numbers, the battle is not over,” matod sa DOH. “We do want the public to be complacent and to think that everything is already ok.” (HDT, Sunstar Philippines)