Contact sa piniriso sa City Jail dakpan sa buy-bust

BISAN naa na sud sa Cebu City Jail, nakapadayon sa iyang negusyo ang usa ka inmate pinaagi sa iyang contact sa gawas nga nadakpan sa buy-bust sa Philippine Drug Enforcement Agency (PDEA) 7 niadtong Biyernes sa alas 3 sa hapon, Septiyembre 18, 2020.

Ang suspek mao si Jose Roel Ermitanio, 35, taga sityo Kalubihan, Barangay Guadalupe, Dakbayan sa Sugbo.

Si Investigator Agent 1 Jessie Cabutotan nibutyag nga nakuha gikan kang Ermitanio ang 100 gramos nga shabu nga mobalor og P680,000 base sa Dangerous Drugs Board (DDB) value.

Matod ni Cabutotan nga lima ka adlaw nga gi-monitor sa iyang team ang kalihukan ni Ermitanio hangtod na nga giplano ang buy-bust.

CITY JAIL

Ilang gikonsiderar si Ermitanio nga high value individual tungod sa pagkalambigit sa ngalan niini sa usa usa ka piniriso sa Cebu City Jail.

Si Ermitanio, sa iyang habig, niangkon nga kaduha na ka higayon siya gisugo sa iyang agawon nga nagngalan og Apyot nga anaa sa sulod sa jail.

Matod niya nga mao kini ang motawag kaniya aron siya sugoon sa paghatod sa drugas samtang dunay laing tawo nga maoy mokontak niya aron makigkita aron pagtunol sa drugas.

Dugang ni Ermitanio nga magpaabot lang siya sa tawag ni Apyot kinsa ang hatagan sa drugas bugti sa P2,000 nga suhol kon mahuman na ang transaksiyon.

Matod ni Cabutotan nga si Ermitanio ig-agaw ni Juan Ermitanio, kinsa nadakpan sa samang team sa Barangay Tisa, Siyudad sa Sugbo sa milabay nga buwan.

Sa laing buy-bust sa Sawang Calero Police Station, tulo pa ka mga durugista nadakpan niadtong Biyernes pasado alas 11 sa gabii sa dan Lakandula, Barangay Pahina San Nicolas, ning siyudad.

Si Police Major Eduard Sanchez, hepe sa Sawang Calero Police Station, maoy nangu sa operasyon, niila sa mga suspek nga sila si Rolando Barba, 37, taga Salvador Extention, Barangay Labangon; Niko Mateo, 19, taga Barangay Punta Princesa ug Marygrace Badayos, taga Barangay Pasil.

Nasakmit ang 10 gramos nga shabu nga dunay DDB value nga P68,000.

Matod ni Sanchez nga si Barba ang ilang target samtang ang duha mipalit.

Ang mga suspek temporaryo una nga gipriso samtang giandam ang mga kasong ipasaka batok kanila. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph