GIPANGLANTAWAN nga laing kamandoan pagpahunong sa operasyon batok sa Dolomite Mining Corporation (DMC) ug Philippine Mining Services Corporation (PMSC) ang luwatan sa Kagamhanan sa Probinsya sa Sugbo human nasuta ang pagkadaot sa pipila ka bahin sa dagat sa Barangay Pugalo, Alcoy, Sugbo, nunot sa bug-at nga siltation.
Ang maong kalamboan nasuta human sa survey sa mga sakop sa Provincial Environment and Natural Resources Office (PENRO) ingon man sa engineers nga gitahasan sa pag inspeksyon sa Barangay Pugalo.
Atol sa pagsusi, nakita ang particles sa dinugmok nga dolomite nga naanod sa dagat atol sa pag- transport sa barko pinaagi sa conveyor belt.
Matod sa Penro nga moabot sa 500 metros nga mga coral ang nangadaot hinungdan nga nagputi na ang dagat.
Tungod niini, nihangyo si Cebu Governor Gwendolyn Garcia sa Environmental Management Bureau (EMB) nga ipaubos sa imbestigasyon ang lugar human sa gipakita nga ebidensya sama sa hulagway ug video sa Penro.
Kini atol sa tigom sa PENRO, EMB, Department of Environment and Natural Resources (DENR), DMC ug PMSC sa Septiyembre 17.
Niisyu na og cease and desist order si Gobernador Gwendolyn Garcia sa duha ka mga kompaniya tungod sa ilang pagpamaligya og dolomites sa lokal nga merkado bisan kon wala kini labot sa ilang kontrata.
Una na nga nipadayag si Garcia nga kinahanglan nga motuman ang kompaniya sa mga rekisitos sa Probinsya sama sa pagkuha og governor’s permit aron maka operate sa quarry ingon man pagbayad sa buhis niini.
“Let me reiterate. We are not against the Manila Bay beach nourishment project. Wa mi mag apil-apil ana because you (DENR) would always nourish the beach by getting your resources elsewhere. But you are getting resources from the Province supplied by DMC, extracted by DMC, and under the provincial ordinance, our Tax Code, they are supposed to pay 10 percent of the fair market value of quarry resource,” matod sa gobernador.
Atol sa tigom, gipasabot ni Atty. Benjamin Cabrido ang mga legal provisions sa katungod sa Probinsya labot sa mga kompaniya nga mipahigayon og extraction sa mga minerales ingon man quarry sa balas ug graba.
Ubos sa Article E, Section 24 sa Provincial Ordinance No. 2008-10, gikinahanglan nga mobahin og 10 porsyento nga buhis ang mga kompaniya sa Kagamhanan sa Probinsya kon may himuong pag kubkob.
“Province shall impose a tax of 10 percent of the local fair market value per cubic meter for all ordinary stones, sand, gravel, earth and other quarry resources extracted within the territorial jurisdiction of the Province of Cebu.”
Si Provincial Treasurer Atty. Roy Salubre nibutyag nga base sa kwintada sa opisina, gikinahanglan nga mobayad og P726,923.077 sa Probinsya gumikan sa na shipped na niini nga 7,000 metriko tonelada nga dolomites sa Manila alang sa rehabilitasyon sa Manila Bay. (ANV)