TUNGOD sa mga pagduda nga siya gitsismis sa iyang mga silingan, lalake nipusil patay sa amahan ug anak, apan napatay usab siya sa niresponding kapulisan sa lungsod sa Minglanilla.
Buot ra untang pakalmahon sa iyang mga silingan ang suspek nga si Edwin Ferguson, 32, apan iya na hinuong gipamusil sa Biyernes sa alas 8 sa gabii, Septiyembre 18, 2020 si Roberto Lanillo, 53, ug anak niining si Malbert, 26, sa sityo Kintolimbo, Upper, Barangay Calajo-an, lungsod sa Minglanilla, habagatang Sugbo.
Si Roberto namatay diha-diha sa samad sa agtang samtang si Malbert dead on arrival sa tambalanan tungod sa samad sa tangkugo.
Giapil usab og pusil ni Ferguson ang German national nga si Christian Pale Metz,35, silingan ra usab. Si Metz gikatahong naa na sa luwas nga kahimtang sa iyang samad sa tiyan.
Si Police Chief Master Sergeant Ronjie Lopez sa Minglanilla Police Station, imbestigador, niingon nga napatay si Ferguson sa iyang mga kauban kay giingong nisukol.
Matod ni Lopez nga human mamusil si Ferguson, nidagan kini sulod sa iyang apartment nga tupad ra sab sa apartment sa mga Lanillo, apan dihang gisuwayan sa pagpatahan sa kapulisan, niibot kini sa iyang .38 kalibreng revolver ug mamusil unta, apan naunhan sa pulis.
NASUKO
Sa imbestigasyon, matod ni Lopez nga ang banay nga Lanillo nagsultihanay sa gawas sa ilang apartment.
Pipila ka mga oras ang milabay, kalit nga nibutho ang masuk-anong si Ferguson sa tapok sa pamilya nga Lanillo.
Wa nila masuta kon kinsa ang nakalalis ni Ferguson, apan si Roberto giingong niagbay sa suspek aron unta pakalmahon ug ipalayo, apan iyang giwakli ang biktima, niibot sa iyang revolver ug gipusil sa ulo.
Nahagba ug namatay diha-diha si Roberto.
Si Malbert nga mouwang usab unta gisunod sa pagpusil si Ferguson. Naigo si Malbert sa tangkugo.
Gisuwayan sa pagdala sa mga pulis sa tambalanan si Malbert, apan gideklarar sa mga doctor nga DOA.
Si Metz nga niapil sa tapok sa pamilya nidagan, apan gipusil usab siya ni Ferguson sa tiyan. Si Metz gikatahong luwas, apan gioserbahan pa sa mga doctor.
Matod ni Lopez nga sila si Ferguson ug mga Lanillo mga duha pa ka tuig nga namuyo sa apartment. Ilang nasayran nga si Ferguson nasuko sa mga Lanillo kay nagtuo siya nga gi-tsismis sa pamilya.
NASILO?
Samtang si Alvin Arda, umagad ni Roberto, nga nahinabi sa Superbalita Cebu, nga samtang sila nagkukabildo, kalit nga niabot si Ferguson nga masuk-anon.
Kaniadto si Ferguson ug mga Llanillo kauban pa nila sa ilang panag estorya ug panag tapok, apan duha na katuig ang milabay giingong si Ferguson wa na makig-uban.
“Natingala nalang gani mi nga kanang namusil mga two years na nga wala na nakig-uban kon magtapok mi. Naa pa gani duha ka higayon nga Christmas party nga kuyog pa na namo si Ferguson,” nagkanayon si Arda.
Sila si Arda ug iyang asawa nga naa namuyo sa Barangay Busay, Dakbayan sa Sugbo, nangadto sa Minglanilla aron pagduaw sa iyang mga ugangan.