GITUKOD ni Mayor Edgardo Labella ang usa ka task force nga iyang gitahasan sa pagtuon ug paghan-ay sa mga lakang aron makabalik ang tradisyunal nga mga PUJ nga sud na sa mga pito ka buwan nga wan-a makadagan sa mga karsada.
Kay wan a makadagan,liboan ka drivers ug operators ang nawad-an og income. Ang nakapait kay way hinabang nga gihatag ang kagamhanan. Kon naa man, pudyot ra kaayo. Ang mga driver gud intawon sa Metro Manila nagpakilimos sa dalan. Dunay mga sector nga naluoy, gipangtabangan sila.
Wa man tingali problema kon pabalikon ang tradisyunal nga mga PUJ sa kadalanan basta subayon lang ang mga protocol sa kagamhanan. Sama anang pagbutang og plastic nga barrier tali sa mga pasahero ug katunga lang sa iyang kapasidad ang makarga. Kinsa tong masakpan nga makalapas, pahamtangan og silot.
Husto si Labella, kinahanglan usab nga hashasan unag maayo kadtong makabalik sa pagpamasahero. Kinahanglan ilang bayran ang dugay nang pending nga mga bayrunon sa gobyerno, sama sa mga kalapasan sa balaud sa trapiko. Gikinahanglan nga ila usab nga tubagon ang ilang mga responsibilidad nga ilang gilikayan samtang wa pa ang pandemic.
Kaniadto man gud, daghan sa mga operator ug drivers ang nagsalig kay nagtuo silang maoy hari sa karsada. Karon sa panahon sa coronavirus pandemic, namatud-an nga mahimo ra diay nga wa sila sa karsada. Way nag-antos sa mga driver ug konduktor nga abusado, mao pay masuko kon badlungon kon mag-abusar sa dan.
Makaluluoy baya ang kahimtang ining mao nga sector. Hinaut pa nga tugtan silang makabalik sa dan, apan kon unsa sila ka abusado kaniadto, karong panahuna, kinahanglan na nilang magpaubos. Ila nang usbon ang bati nga taras sa dan. Kadtong maayo, badlungon ang ilang kaubang mga abusado.
Kay tan-awa, ang simpatiya sa publiko wa kaayo sa mao nga sector nga sud sa dugay nga panahon, nag-antos sa kagangkang nga PUJ.