SUPERBALITA CEBU

P61.3M shabu nasakmit

SHABU. Sila si Cebu City Mayor Edgardo Labella (tuo) ug Police Regional Director Albert Ignatius Ferro misusi sa kinilo nga shabu nga nasakmit sa kapulisan sa Cebu City Police Office (CCPO)./ARNOLD Y. BUSTAMANTE

MOABOT sa P61.370 milyunes ang balor sa ilegal nga drugas nga nasakmit Police Regional Office (PRO) 7 sa duha ka managlahing anti-drug operations kagahapon sa kaadlawon, Septiyembre 20, diin usa ang nakalas ug tulo ang nangadakpan nga suspek.

Ang labing dako mao ang nakuha sa mga sakop sa Cebu City Police Office (CCPO) nga gingulohan ni Police Colonel Josefino Ligan ug Police Major Randy Caballes, hepe sa City Intelligence Unit, inabagan sa Regional Intelligence Divison diin nakasakmit silag pito ka kilos sa gituohang shabu nga mokantidad sa P47.6 milyunes.

Sa alas 7:45 sa buntag sa Dominggo, nasikop sa gilusad nga buy-bust ang tulo ka mga lalake sa Sitio Tipolo bridge sa Andres Abellana Extension, Barangay Guadalupe, siyudad sa Sugbo nga mao sila si Rolando Ondoy Romeo alyas Lando, 32, manghod niini nga si Edward Ondoy Romeo, 24, ug Calvin Hermoso Valdez, 42, pulos molupyo sa naasoyng lugar.

Gituohan sila nga mga sakop sa Ygot drug group nga nagpadagan sa ilegal nga drugas sa dakbayan ug lalawigan sa Sugbo.

Nakuha gikan kanila ang pito ka dagkong putos sa gituohang shabu nga gisulod sa Chinese tea bag nga motimbang sa pito ka kilos.

Lakip sa nakuha ang boodle money nga mokantidad sa P1.6 milyunes isip buy-bust money ug ang maroon nga Toyota vios nga adunay plate number GEC 8759 nga gipanag-iya sa usa ka nurse nga nagtrabaho sa usa ka publikong tambalanan sa dakbayan sa Sugbo.

Matod ni Police Major Caballes, duha ka buwan nila nga gi-surveillance ang mga suspetsado sa wala pa gilusad ang buy-bust.

Giingong gikan sa San Carlos City sa Negros Occidental ang maong ilegal nga drugas ug gisakay kinig barko paingon sa siyudad sa Toledo diin si Lando ang nisugat niini sa pantalan.

Nakapangalan ang maong kontrabando ni Rustico Repuela Ygot alyas Dikoy nga nabilanggo na sa Zamboanga penal farm human madakpan sa mga sakop sa Philippine Drug Enforcement Agency 7 niadtong Mayo 18, 2010 ug nakombikto niadtong Hulyo 25, 2013.

Gibutyag ni Lando nga makaduha pa sila nakabaligya sa gipadala kanila sa wala pa niadtong unang semana sa Abril 2020, atol nga gipaubos sa enhanced community quarantine ang tibuok isla sa Sugbo.

Sa maong adlaw, miabot sa siyam ka kilos sa gituohang shabu ang ilang na-deliver sa siyudad ug lalawigan sa Sugbo lakip na sa probinsya sa Bohol.

Apan wala sila masayod kinsa ang tag-iya sa ilegal nga drugas kay igo lang matod pa sila hatdan ug ihatod sa mokuha niini.

“Wala mi kahibawo kinsa ang tag-iya ana kay igo lang man namo na ihatud kung asa na siya ipahatud sa nagtawag. Wala gani ko kahibawo unsa diay na, natingala ko nga nakahibawo siya sa akong number,” matod ni Rolando Romeo sa dihang gipangutana kini ni Cebu City Mayor Edgardo Labella.

Midalikyat usab sa pagsaksi si Labella sa mga nakuhang ebidensya ug mihulagway siya nga alarming na ang gidaghanon sa nakuha sa kapulisan.

Matod sa mayor nga kon wala pa masakmit ang maong gidaghanon sa ilegal nga drugas daghang utok ang mangadaot.

“Kadaghang utok mangaguba ani, Dong, kadaghang kaugmaon ang ma daot,” matod ni Labella.

Tungod sa malampuson nga nahimo sa mga pulis sa dakbayan, nisaad ang mayor nga iyang hatagan og pasidungog ang mga pulis nga nilangkob sa pagkasikop sa tulo.

“I would like to commend also the police, Colonel Ligan, General Ferro nga despite the kining atong focus sa pakigbugno sa pandemic, salamat sa Ginuo nga sa ilang paningkamot uban sa mga barangay officials mi-flatten ang atong curve but at the same time dili sad nato kalimtan that there is another battle that’s going on this illegal drugs, that’s why we commend the police,” matod sa mayor.

Si Police Brigadier General Albert Ignatius Ferro, hepe sa PRO 7, nagkanayon nga gikan sa gawas sa nasod ang supply sa ilegal nga drugas nga naabot sa Sugbo tungod sa packaging niini nga gisulod sa Chinese tea bag.

Matod niya, gikan sa golden triangle ang maong supply nga nagbase sa nasod sa Myanmar nga gipalusot sa Pilipinas.

Ug tungod sa kadaghan sa entry points sa isla sa Sugbo, sayon lang kaayo nga makalusot ang mga kontrabando nga dili dayon mamatikdan sa mga police ug ubang ahensya sa gobiyerno.

“The problems of Cebu is very porous, there’s a lot of entry points, they could use the legal transport system to bring this kind of contrabands,” matod ni Ferro.

Samtang, alas 12:20 sa kaadlawon sa samang adlaw, napatay usab sa mga sakop sa Provincial Drug Enforcement Unit ug Regional Drug Enforcement Group 7 ang nalakip sa high value individual sa Sibulan Negros Oriental nga nakuhaan og kapin sa duha ka kilong shabu nga mokantidad ang tanan og P13,770,000.

Ang napatay nga drug personality mao si Joemarie Yongco alyas Joe, 26, taga Barangay Rizal, San Carlos City Negros Occidental.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph