NAGHINAMHINAM na ang mga chess enthusiasts sa giplanong labing unang professional league nga mao ang Professional Chess Association of the Philippines (PCAP) nga posibleng sugdan sunod tuig.
Ang Sugbuanong International Master (IM) Kim Steven Yap sa Cebu School of Chess miingon nga usa kini ka dakong kalamboan alang sa chess players sa nasod nga dugay nang nangandoy sa ingon ani nga liga.
Si Yap nakaapil sa usa ka pro league sa China niadtong tuig 2013.
Para kaniya ang pro league makatabang sa pagpalambo sa abilidad sa Filipino players. Mas mahatagan pud og daghang exposure ang mga maayo nga players.
“Nindot gyud if progressive, willing mi mo-cooperate. Para moasenso pud ang chess players sa atoa,” sigon ni Yap.
“Nabuhat naman ni siya sa China. Ang sa China kay naa pud sila clubs unya naay mga sponsors, ila team naa gyud mga grandmasters nga gipang-hire pud siguro as coaches sa mga bata aside sa ilang pagka players.”
Ang PCAP planong sugdan sunod tuig pinaagi sa All-Filipino Conference.
Si PCAP founder ug commissioner Paul Elauria miingon nga magdepende ang tanan sa kondisyon sa pandemiya.
Magbuhat sila og application sa players ug drafting una nila pormal nga sugdan ang maong pro league.
Ang tanang proseso gilauman nga makompleto sa sayong bahin sunod tuig.
Sa pagkakaron aduna nay 12 ka teams nga nagpadayag sa ilang kagustohang moapil.
Mao kini ang San Juan Preda-Torres, Cagayan Valley Kings, Makati Red Gambits, Palawan Beach Masters, Subic/Zambales Knightmares, Tarlac Top Guns, Pampanga Master Bankers, Pasig Pawn Stars, Mindoro Golden Tamaraws ug Manila Noble Knights. (RSC)