NAKA-COMMIT na ang longest Filipino boxing champion nga si Donnie “Ahas” Nietes sa bag-ong boxing stable nga maoy modumala kaniya sa iyang umaabot nga away nga posible mahitabo sa ulahing bahin niining tuiga.
Gibutyag ni Nietes sa Superbalita Cebu nga aduna na siya’y gikasabot nga manager o promoter apan mihangyo nga dili lang una kini niya nganlan ug maghuwat lang siya nga ang pikas habig ang mo-anunsiyo niini.
Matod sa kanhi three-division world champion, nga basin moanunsyo na ang bag-ong modumala kaniya karong semanaha.
Ang maong lakang nagpasabot lang nga mobalik na sa ring ang lumad nga taga Murcia, Negros Occidental human sa dul-an duha ka mga tuig.
Ang iyang uwahing away batok kang World Boxing Organization (WBO) super flyweight champion Kazuto Ioka niadto pang Disyember, 2018.
Gipalakbit ni Nietes (42-1-5, 23KOs) nga dako nga promoter ang modumala kaniya ug adunay posibilidad nga makahatag kini sa iyang gidamgo nga mga away batok nila Juan Francisco Estrada, Srisaket Rungvisai o Roman “Chocolatito” Gonzales.
“Nindot man ilang offer, hatagan ko nilag tune-up fight by December o January next year,” sigon ni Nietes.
“After that mo-negotiate na sila ni Gonzalez, Estrada o Rungvisai.”
Walay laing gibati si Nietes kon di ang pagka-excited niining bag-ong hugna sa iyang boxing career human siya nahimong free-agent tungod sa pagkasirado sa kanhi niya boxing stable nga ALA Gym.
Ang ALA Gym nasirado human sa 35 ka mga tuig nga operasyon tungod sa epekto sa pandemiya ug pagkasirado sa ilang TV partner nga ABS-CBN.
“Excited kaayo kay dugay-dugay nako wala kabalik sa babaw ring. Super excited ko nga naay ni-offer nako ingon ana,” saysay sa 38-anyos nga si Nietes.
“Dako-dako man ni (promoter/manager) sila si capable ni mo-negotiate og dako nga away sa ako.”
Sa pagkakaron nag individual conditioning pa siya Nietes sa ilaha kay aduna pa may hulga sa Covid-19.
Na-busy pud siya sa iyang negosyo nga patinda og daily goods sama sa bugas, gulay, chorizo ug uban pa.
“Sa pagkakaron lang nagpa gamay-gamay nasad ko. Continue man gihapon tag pasingot. Naa raman ko gamit diri sa balay,” ingon ni Nietes.