Dear Papa Joe,
Ako si Leny, 28 anyos. Gikan ko og Taiwan pero sa wala pa ang lockdown. So, diri sa ko sa Cebu City nag-work hangtud nga na-lockdown.
Karon, ni-apply ko og pagka locally stranded individual (LSI) para Leyte ug nakauli ko, apan subo kaayong sabton nga lahi ang pagdawat sa akong mga igsuon nako. Human ko na quarantine og 21 days sa amo, di ko dawaton sa akong igsuon kay una ko makauli kinahanglan ipa-swab kuno ko para siguro pero akong ginikanan okay ra man. Nalain ko niya kay sa pagkakaron, naa lang ko nag-stay sa balay sa akong amiga. Nahibaw-an pa lang daan maayo pa wa na lang ko mouli kon mao rani ilang pagtan-aw nako. Di sad ko kabalik sa Cebu kay LSI man ko. Unsa man angay buhaton nako? Abi wala na man koy kwarta inganion na lang ko. Sa una, maglumba sila sa pasugat nako. Karon, maora ko og naay sangla. Maayo pa ang laing tawo.
LENY
Leny,
Paet man pero di ta kapugong sa hunahuna sa ubang tawo, kadugo man o di kon inosente kini sa kamatuoran sa panghitabo sa atong kalibutan.
Siguro kon naa lay mga tawo nga makapasabot nila, basin mausab pa. Mao kon gusto ka pwede nimo hangyuon inyong barangay nga magpadala ba og health worker nga mopasabot kanila. Siguro tungod sa balita nahadlok kaayo sila mao ayaw lang sa pangluod. Paabuta nga makasabot sila kay sa tinuod lang, di lang ikaw ang nakasinati ani, naay daghan. Kana lang ug daghang salamat.
Papa Joe
(sa inyong tampo ipadangat lang sa papajoesuperb@gmail.com)