NING panahon sa pandemic, ang mga miyembro sa Barangay Biga Women Workers Association (BBWWA) nakahunahuna sa pagpangita og kuwarta ug ilang gisakyan ang demanda sa pagka humalitan sa itlog.
Ang pagtabang sa ilang komunidad maoy prayoridad. Ang asosasyon nitabang sa nanginahanglan pinaagi sa ilang produkto ngadto sa Toledo City Social Welfare Office, Toledo District Hospital ug Barangay Local Government Unit labi na sa mga boluntaryo.
“Mihatag mig tag napulo (10) ka trays sa itlog sa City Social Welfare Office, sa Toledo City hospital ug sa barangay kay maayo nalang pud nila nga sila gyud nagserbisyo karon panahon sa pandemic,” pasabot ni Francisca Abanes, sakop sa BBWWA.
Ang asosasyon nitabang sa komunidad. Atol sa quarantine period, ang kasagaran sa mga lumolupyo dili dayon makalakaw sa pagpalit og pagkaon sa merkado.
“Dako kini og natabang sa mga lumolupyo tungod kay dili naman makayano og gawas. Busa diri na sila mopalit og itlog sa mubo nga presyo. Daghan usab nakapahimus sa silingan nga barangay,” dugang ni Abanes.
Si Valentina Razula mapasalamtron nga niapil sa asosasyon human nakatabang sa iyang pamilya gikan sa iyang kinitaan.
“Wala kaayo mi naka-feel og kalisod kay naa man gihapon mi ginagmay nga kita gikan sa itlog,” matod ni Razula.
Ang BWWA nagsugod sa iyang negosyo sa 2018 uban sa P1.9 M nga puhonan gikan sa Sustainable Livelihood Program sa Department of Social Welfare and Development (DSWD).
Ang asosasyon naghatag og opurtunidad sa pag-abli sa negosyo uban sa damgo nga kaya sa mga miyembro. Sulod na sa duha ka tuig karon, sila nagsugod sa pagpaitlog sa manok ug pagbaligya niini.
Ang asosasyon nagpasalamat sa kagamhanan ug ang programa alang sa kababayen-an nga naghatag kanila og dugang kinitaan sa ilang tagsatagsa ka pamilya. (PR)