ORMOC City, Leyte - Duha ka lalake ang nasikop sa kapulisan gumikan sa ilegal nga drugas.
Ang operasyon gipahigayon sa Purok 3, Barangay Linao ning dakbayan, alas 11:40 sa buntag, Biyernes, Septiyembre 18, 2020.
Giila ang mga dinakpan nga sila si Jay Malayan, 27, waiter sa usa ka restaurant ug nagpuyo sa Bonifacio St. ning dakbayan.
Laing suspek mao si Jomar Abella, 27, taga Barangay Don Felipe Larrazabal sa samang dakbayan.
Usa ka poseur buyer ang nakigtransaksyon sa suspek diin napalitan kini og usa ka pakete sa gituhoang shabu sa kantidad nga P500.
Matod sa kapulisan sa Ormoc City Drug Enforcement Unit, taud taud na nila gipanid-an ang suspek sa ilegal nga kalihukan.
Nakadawat ang kapulisan og impormasyon niini hinungdan nga ila kining gipanid-an.
Gipaabot sa kapulisan ang mga sakop sa media, korte ug opisyal sa barangay alang sa pagrekisa.
Nakuha sa kapulisan sa posisyon ni Malayan ang 500 nga buy bust money, coin purse, tulo ka pakete sa gituhoang shabu nga mitimbang og 0.2 gramo ug dunay kantidad nga P1360, duha ka foil ug cash.
Samtang, nakuha gikan sa posisyon ni Abella ang usa ka taas nga pakete nga may gituhoang shabu nga sama og timbang ug kantidad sa nakuha kang Malayan lakip sa tin foil nga gamit sa pagsuyop sa drugas.
Ang duha naa na sa kustodiya sa Police Station 3 ug gipasakaan og kasong kalapasan sa Philippine Anti Dangerous Drugs Act. (JKDP)