DAGHAN ang wa kalahos kay nabaraw ang ilang mga plano sa paglulinghayaw padung sa mga suroyanan sa probinsiya tungod sa estriktong pagpatuman sa mga protocol sa atong panglawas. Usa na niini ang transcentral highway diin ang atong kapulisan nipatuman og mas hugot nga pagkontrolar sa bul-og sa mga motorista nga gustong magpa bukid.
Ang report nga akong nahipos naghisgut sa pagbaha sa mga sakyanan sa maong dapit sa pagsugod sa modified general community quarantine (MGCQ). Kon daghan ang motungas, kalipay kini sa daghan natong kaigsuonan nga nanginabuhi daplin sa highway.
Nag-una niini mao ang mga naninda og pagkaon. Mga kan-anan nga nanurok daplin sa karsada. Pun-an pa sa mga utanon, lagutmon ug mga tanom nga makapadani kaayo niadtong mga hilig sa gardening. Wala pa ni labot sa mga nindot nga talan-awon nga iyaha sa kinaiyahan.
Unsaon nga dili man normal ang panahon. Pailob lang sa ta. Sabton nato ug suportahan ang paningkamot sa kagamhanan nga sa hingpit mapalayas ang gikahadlokan nga coronavirus. Way nasayod kanus-a pero inubanan sa mga pag-ampo matapos ra ning tanan natong pag-antos.
* * *
Gibalitaan ko ni Sir Renester Suralta, principal sa Makatol Elementary School nga nahimutang sa bukirang barangay sa siyudad sa Toledo, nga may bag-ong kaugmaran ang ilang paningkamot nga madonar sa habig sa Department of Education (DepEd) ang luna nga nahimutangan sa maong eskwelahan. Ang eskwelahan sa Makatol sa Barangay Biga, nahimutang sa luna nga iya sa Carmen Copper Corp.
Duha na ka dekada nga nag-alagad ang maong eskwelahan sa kabataan sa maong dapit. Tungod kay wala pa madonar ang maong luna, ang DepEd dili pa sab makapabarug og klaro nga school building. May angay tukion sa sa donation nga gipaabot nga mahimong sentro sa diskusyon sa higayon nga magkaatubang ang management, barangay ug DepEd.
Kini maoy nindot nga huwaton sigon sa inpormasyon nga gipadangat diri ka nako ni sir Suralta. Ako nagtuo nga kon edukasyon sa mga bata na gani ang hisgutan, dili lisod nga magkatakdo ang maayong hunahuna dili lang diha sa Makatol apil na ang ubang eskwelahan nga may problema sa deed of donation. Sa giingon pa, ang ingon niini nga problema may solusyon. Sabotsabot sa masig ka habig angay nga paaboton.
* * *
Taudtaod na diay nga nipahulay gikan sa katungdanan ang usa sa akong new source sa Philippine National Police (PNP) nga si Atty. Julius Ompad. Ni-retiro siya niadtong 2017 sa ranggo nga police major. Apan wa magdugay ni-apply siya pagka prosecutor ug nadawat sa pagka Mayo 2019. Karon ang kanhi Major Ompad sa PNP, karon Prosecutor II na sa Department of Justice. Nindot sab ang iyang career development.
Gobyerno ang giserbisyohan sa duha ka managlahi nga ahensiya kansang panerbisyo naka tutok sa pag-angkon og hustisya alang sa mga nilupigan. Pahalipay sab diay kang Atty. Ompad kay ang iyang anak nga si John Patrick bag-o lang nahimong abogado sama kaniya.