LISOD ang pagsaulog sa okasyon panahon sa coronavirus disease 2019 (Covid-19) pandemic tungod sa pag-limit sa kagamhanan sa panagtapok ug pag-insister sa mga batid sa panglawas sa pagsunod sa lagda alang sa kaluwasan.
Taliwala sa pagpakabana sa Covid-19, ang mga haligi sa mamahayag sa Sugbo nakahukom sa paghimo og espisyal nga kasaulogan sa Cebu Press Freedom Week 2020.
Gipatigbabaw ang kamahinungdanon sa mga kalihokan isip pagpadayag sa importanteng papel sa media sa hagit ning panahona ug ang pagluwat og mga pamahayag sa pagsuporta sa media nga gawasnon sa paglutos o censure.
Ang industriya sa media sa Sugbo misaulog sa press freedom week sugod karon, Septiyembre 21, anibersaryo sa pagdeklarar sa martial law niadtong 1972, isip pagpahinumdom sa dulom nga panahon sa kasaysayan sa media sa nasod.
Lahi ang kasaulogan ning tuiga human ang mga mamahayag nagtamod sa mga protocol batok sa pagkaylap sa Sars-CoV-2 nga hinungdan sa Covid-19. Way linawas nga panagtapok.
Magpadayon ang naandang kalihokan sa semana, apan ang tanan himuong online sama sa mga tigom ug seminar, fora ug uban pa. Wala palabya ning tuiga ang kasaulogan tungod karon ang tukmang panahon sa pagpahinumdom sa mamahayag sa ilang importanteng papel diha sa pagpakaylap sa kasayoran.
Sama sa pagpagawas sa dinaliang balita bahin sa Covid, may matigam-an sa taho ug nawala ang pagpalawom sa istorya nga gihiklin lang una.
Ang breaking-news mindset, nakomplikado ning panahona sa mga tinubdan sa kagamhanan nga naghatag sa mga sayop ug makalibog nga kasayoran, naghatag og risgo sa mamahayag sa cyber abuse ug akusasyon nga ‘fake news.’
Ang news organizations nag-apas sa digital transformation aron pag-abot sa mas halapad nga sumosunod, buot makahuloganon ug mopadayon sa pagserbisyo sa publiko bisan sa work-from-home nga pamaagi.
Dugang pa, ang news organizations mipatuman sa higpit nga pagdaginot ug dinaghang pagpanaktak sa mga kawani aron mabuhi human sa grabeng pagkunhod sa kita sa advertising ug circulation.
Pipila lang ang nabilin sa newsroom ug nakibhangan ang pwersa ug kapasidad. Ang kuwestiyon sa kamalahutayon sa pinansiyal padayong naghamok sa industriya.
Daghang community newspapers sa Visayas mihunong sa operasyon. Ang ABS-CBN misira sa iyang Central Visayas offices, dili tungod sa pandemic apan ang House of Representatives committee nisalikway sa ilang aplikasyon alang sa franchise renewal.
Mas sayon ang pagtahan taliwa sa kahadlok ug walay kasegurohan, apan duna pay igong lawak sa paglaum.
Ang halapad nga maabot pinaagi sa online nagpasabot sa opurtunidad. Ang kritikal nga social media audience nagdasig sa partisipasyon ug pagtuki. Ang lean-and-mean newsroom pabor sa financial controls, flexibility ug kasayon sa pagsagop sa kausaban.
Ang determinasyon sa pagpadayon sa lahi nga kasaulogan sa Cebu Press Freedom Week 2020, sama nga naggiya sa Cebu media nga mopadayon human sa pandemiya.