GRUPO sa Bangsamoro Islamic Freedom Fighters (BIFF) ang gitudlong mga suspek sa pagpabusikad og bomba sa panon sa mga sundalo alas 8:20 sa gabii niadtong Biyernes sa Barangay Limpongo, Datu Hoffer Ampatuan, Maguindanao Province.
Sa maong insidente, usa ka Sergeant Rhyll Angot ang namatay samtang laing upat nga kaubanan niini ang nangasamdan sa mga tipaka sa bomba nga sila si Sergeant Erasmo, Sergeant Amod, Private First Class Nollido ug PFC Ullanes, mga sakop sa Navy's 5th Company sa Marine Battalion Landing Team (MBLT-5).
Sa taho gikan sa 601st Brigade, nasayran nga nagdagan ang convoy sa mga sakyanan sa Philippine Marines (PM) sa national highway sa Barangay Limpongo. Apan kalit lang mibuto sa daplin sa kalsada ang usa ka improvised explosive device (IED).
Tungod sa kakusog sa impak niini, lima ka sakop sa MBLT-5 ang nangaigo.
Gisapupo dayon ang mga samaron sa ilang mga kaubanan ug gidala ngdato sa Maguindanao Provincial Hospital apan namatay si Angot.
Gibalhin sab dayon ang upat ka samaron sa Camp Siongco Hospital ug giingong anaa sa talandugong kahimtang.
Gikanayon ni 6th Infantry (Kampilan) Division Chief, Major/General Juvymax Uy nga paingon unta ang mga sundalo sa gilusad nila nga law enforcement operation batok sa BIFF sa diha nga nabuthan sa IED.
Gipalig-on pa sa Joint Task Force Central ang paglutos sa BIFF nga nagtago-tago sa SPMS box ug Liguasan Delta sa maong probinsiya.