SUPERBALITA CEBU

6 nasikop sa tigbakayan

NADAKPAN sa mga sakop sa Talisay City Police Station (TCPS) ang unom ka mga tawo sa Zone 6, Barangay San Isidro.

Kini human nakadawat og sumbong ang mga pulis kalabot sa mga tawo nga nagtapok tungod sa tigbakay.

Gialarmahan sa mga pulis nga miresulta sa pagkasikop sa unom ka mga tawo.

Si Police Major Gerard Ace Pelare, hepe sa kapulisan sa dakbayan sa Talisay, miila sa unom ka mga dinakpan nga sila si John Ray Labrador Yee, 27, molupyo sa Barangay Panadtaran sa lungsod sa San Fernando; Leevan Restauro Labajo, 30, taga Sitio Ilang-Ilang sa Barangay Lagtang; Niere Friolo Bienvenido, 54, molupyo sa Sitio Uldog, Barangay Cansojong.

Dugang nadakpan sila si Miguelito Magdalones Rabaya, 60, nga taga Sitio Panaghiusa, Barangay San Isidro; ug sila si Richard Geverola Masuela, 34, ug Joseph Yosores Gabotero, 29, pulos taga Barangay San Isidro, dakbayan sa Talisay.

Nakuha gikan sa unom ka mga badlungon ang duha ka mga manok igtatari, ang usa samdan samtang usa namatay sa tari. Duna usab nakuha nga kwarta nga moabot na sa P650.

Bisan ang Talisay gipailawom na sa modified general community quarantine (MGCQ) niining padayong pakigbatok sa krisis sa pandemiya, apan wala pa gihapon gilibkas ang siyento porsiyento nga kagawasan sa publiko ug dunay limitasyon.

Ang mga pulis sa maong siyudad padayon nga nagpatuman sa hugot nga pag-monitor sa palibot sa siyudad ug pagpangdakop sa mga wala motuman sa health protocol labina sa panagtapok ug social distancing.

Sa MGCQ, gidili pa gihapon ang pagtapok sa gawas aron pabiling mapugngan ang pagkatap sa maong kagaw.

Bisan paman niana, duna gihapony mga gahi og ulo nga mga tawo ingon man dili makasabot sa maong pahimangno sa mga pulis nga dili mogawas nga walay insaktong depensa sa lawas.

Ang tigbakayan usa sa mga ilegal nga sugal ug hingpit nga gidili ning panahona. (BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph