USA ka babaye nga taas nga lider sa New People’s Army (NPA) nasikop sa mga sakop sa 47th Infantry Battalion sa Camp Rajah Sikatuna, Carmen ug sa kapulisan sa lungsod sa Carlos P. Garcia, lalawigan sa Bohol niadtong Huwebes, Septiyembre 17.
Kini pinasikad sa warrant of arrest nga giluwatan ni Judge Virginia Tehano-Ang sa RTC 11, Branch 1 sa dakbayan sa Tagum, Davao del Norte.
Ang nasikop mao si Junifie Dagale alyas Chang/Tanya/Habagat ug Inang, 43, didto sa balay sa kabanay sa iyang bana sa Barangay Aguining, lungsod sa Carlos P. Garcia Bohol.
Nalutsan siyag warrant sa kasong murder diin sakop siya sa intelligence unit sa regional operation command ubos sa Mindanao Regional Committee nga naglihok sa Davao region.
Si Dagale miyembro sa usa ka progresibong grupo sa Davao ug nahimong lider sa Guerilla Front 33 nga naglihok sa Davao region.
Nalambigit matod pa siya sa mga teroristang kalihukan sa NPA nga mao ang pagpangronda, pagsunog sa kabtangan, kidnapping ug pagpang-ambush sa mga sundalo ug mga pulis gamit ang improvised explosive device (IED).
Isip sakop sa intelligence unit sa NPA, apil siya sa tulo ka hugna nga pagsulong sa Linda Patrol base sa lungsod sa Nabunturan Davao de Oro niadtong 2008, Napungas Patrol base sa Asuncion Davao del Norte ug sa Earth Savirs Security Agency sa Libertad, dakbayan sa Butuan Agusan del Norte niadtong 2012.
Niadtong 2013, sila usab ang nagdagit sa jail warden sa Compostela Provincial sa dakbayan sa Panabo Davao del Norte.
Apil usab siya sa plano sa pag-ambush sa tropa sa gobyerno ug sakop sa Department of Social Welfare and Development niadtong 2014 sa Kapalong Davao del Norte nga niresulta sa kamatayon sa usa ka sundalo.
Laing duha ka pagpanulong nga gihimo niadtong 2015 diin ang ilang target mao ang usa ka mining compound sa Monkayo Davao de Oro ug Mati Police Station sa Davao Oriental.
Kasamtangan nga naa sa kustodiya sa 47TH IB ang maong taas nga opisyal sa NPA ug gitakdang dalhon kini didto sa dakbayan sa Davao aron ipresenter siya sa korte nga maoy nag-issue sa warrant of arrest.
Gipahugtan karon ang intelligence monitoring sa kapulisan ug sa Central Command human sa sunodsunod nga pagkadakop sa mga tag-as nga opisyal sa NPA didto sa Bohol.
Nagtuo ang kapulisan nga gihimong tagoanan sa mga komunista ang Bohol human sila gilutos na sa gobyerno aron mahunong na ang kalihukan sa mga rebelde sa lalawigan ug Central Visayas. (AYB)