SUPERBALITA CEBU

Papa, mama, 2 ka anak nangapaig

AMAHAN uban sa iyang asawa, ug duha ka mga anak ang nangapaig human nasunog ilang panimalay sa Sitio Walog, Barangay Balabagon, lungsod sa Moalboal, lalawigan sa Sugbo niadtong Dominggo sa alas 12:00 sa tungang gabii, Septiyembre 20.

Ang mga biktima mao sila si Jonathan Masuela, 38; Rose Masuela, 38; ug mga anak nga sila si Sib Jethro Masuela, 12, ug Dyren Masuela, 14.

Si Fire Officer 2 Gibson Hortelano sa Moalboal Fire Station nga nahinabi sa Superbalita Cebu nagkanayon nga nahinanok na sa pagkatulog ang pamilyang Masuela, dihang niulbo ang kayo nga gituohang diha sa sala nagsugod.

Sumala pa niini nga si Juanito Masuela, 67, amahan ni Jonathan, nibutyag kanila nga nakit-an nila nga ang kayo kusog na kaayo diha sa sala sa panimalay.

Tupad lang silag panimalay mga 5 metros dihang paspas nga gikaon sa kayo ang panimalay sa iyang anak nga ginama sa mixed materials.

Ang usa nga anak si Juvy John, 16, kinamaguwangan maoy nakalingkawas sa pamilya.

Ang bata nibutyag nga duha ka lawak ang ilang panimalay, siya didto matulog sa pikas, ang iyang mga manghud uban sa iyang Papa ug Mama sa pikas lawak.

Gibutyag niini nga nakamata siya sa kasaba, sa gawas sa pag-abli niya sa pultahan gisirhan niya pagbalik, kay kusog kaayo ang kayo ingon man aso.

Wala siya masayod kon ang iyang Papa, Mama ug duha ka manghud nakagawas niadtong higayuna.

Ang iyang gihimo iyang gihinayhinayag tangtang ang bildo sa bintina hinungdan nga siya nakagawas.

Si FO2 Hortelano, mibutyag nga uban nila ang mga bombero sa Badian, ilang giisa sa 1st alarm ang sunog nga midanyos og P15 mil.

Pagkapawong sa kayo, ang amahan ug inahan nga napaig ang mga lawas, nag-ubo sulod sa lawak.

Ang duha ka mga anak nga nangapaig usab diha mag-ubo sa sala sa ilang panimalay.

Ilang gituohan nga nakagawas ang mga bata apan posibling nalumos sa aso hinungdan nga nakuyapan diha sa sala hangtud nga napaig.

“Kining naka-survive nga anak naningkamot siya makaambak sa bintana kay aso unya init na kaayo wala siya magdahom nga nangapaig iyang ginikanan ug mga igsuon,” dugang ni FO2 Hortelano.

Gipadayag niini nga ang panimalay one storey concrete ang atop, dunay kisaming playwood, ug ang mga lawak dunay division sa mga plywood.

Wala masunog sa hingpit ang panimalay kondili ang tibuok sala niini ug ang lawak maoy nangaugdaw.

Giklaro niini nga walay foulplay ang kamatayon sa mga biktima sanglit wala kiniy kontra sa lugar, samtang wala say problema sa ilang pamilya.

Hinuon nagpadayon ang imbestigasyon sa mga bombero aron masuta kon asa gyud nagsugod o unsay hinungdan sa sunog. (GPL, AYB, BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph