Dugang beep sa Talisay-Cebu City

GIPANGLANTAWAN nga mas sayon na sa mga empleyado ug mga pasahero gikan sa dakbayan sa Talisay nga mobiyahe paingon sa dakbayan sa Sugbo.

Kini human nga nitugot na ang Land Transportation Franchising and Regulatory Board (LTFRB 7) sa pagpabiyahe sa mga modern jeep kun beep agi sa Natalio Bacalso Avenue, gikan sa Tabunok agi sa Bulacao padung sa Siyudad sa Sugbo.

Subay sa gipahibawo sa Siyudad sa Talisay, mobiyahe ang mga beep paingon sa dakbayan sa Sugbo sugod karon, Septiyembre 22.

Ang Beep magpaabot og pasahero sa Alturas Terminal sa Barangay Tabunok gikan sa alas 6 sa buntag hangtod sa alas 6 sa gabii.

Ubos sa modified general community quarantine (MGCQ) unang nibiyahe ang mga beep sa barangay Poblacion paingon sa siyudad sa Sugbo agi sa Cebu South Coastal Road.

Si Jonathan Tumulak, pangu sa City of Talisay-Traffic Traffic Operations and Development Authority (CT-TODA), nibutyag nga dunay 16 ka mga beepang gitugotan sa LTFRB nga mobiyahe.

Matod ni Tumulak nga gitugtan ang mga beep nga makaagi sa border control checkpoint sa Bulacao, tali sa Talisay City ug Cebu City.

Ang walo ka mga beep anha manukad sa Tabunok padung sa Bulacao ngadto na sa Cebu City.

Ang laing walo gikan sa Barangay Poblacion, Barangay San Isidro, agi sa Tabunok padung na ngadto sa Bulacao ug Cebu City.

Subay sa listahan nga gipagawas sa isyudad, naglakip sa mga barangay nga maagian sa bus sama sa barangay San Idisro, Talisay District Hospital, San Isidro Action Center ug Gaisano Tabunok.

Magsugod sa P11 ang plitehan sa Beep samtang dugang P1.50 ang ipuno sa matag upat ka kilometro sa mga non-aircon beep ug P1.80 sa dugang upat ka kilometros sa mga aircon nga beep.

Gipasidan-an ni Tumulak ang mga pasahero nga mosubay sa mga health protocol, gikinahanglan nga mag sul-ob gihapon og facemask ug faceshield ug mag physical distancing.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph