Magtiayon gipamusil, patay

PATAY ang magtiayon nga sakay sa motorsiklo human gibanhigan niadtong niaging adlaw sa Purok 3, Barangay Dagumbaan, Talakag, Bukidnon.

Giila ang magtiayon nga sila si Raul K. Ganihay alayas “Kumander Raun”, 54, minyo, trabahante sa Local Government Employee ug giingong CPP NPA supporter nga adunay apilasyon sa Acuman Criminal Group.

Lakip sa namatay ang asawa niining si Jocelyn T. Ganihay, 49, residente sa susamang dapit.

Sa imbestigasyon sa Talakag Police Station sa pagpanguna ni Police Captain Dominador Orate nasuta nga kining mga biktima sakay sa ilang motorsiklo nga Kawasaki KLX 150 nga paagi sa dalan sa Dagumbaan.

Apan pag-abot sa dapit duha ka wala mailang suspetsado ang mitabo sa mga biktima ug namusil makapila ka higayon hinungdan sa ilang hinanaling kamatayon.

Padayon pa nga gisuta karon panahona ang motibo sa pagpamusil.

Si Police Colonel Roel L. Lamiing nagpagawas sab og kamandoan nga kanunay magpahigayon ang kapulisan og mobile patrol aron malikayan ang mga insidente nga susama niini.

Giawhag sab niini ang katawhan nga mokooperar kung namatikdan ang presensya ning maong mga suspetsado.