Motor nabangga sa truck, 3 patay

TULO ka mga lalake nga sakay sa usa ka motorsiklo nangamatay niadtong Dominggo sa kaadlawon, Septiyembre 20, 2020 human sila mabangga sa ten-wheeler wing van nga nag deliver og feeds sa usa ka poultry farm sa national highway sa Barangay Buanoy, lungsod sa Balamban.

Ang mga nangamatay giila nga sila si William Dominic Pierson, 23; Dane Caballero Sultan, 23; ug Steve Wagas Son, 23.

Silang Sultan ug Son pulos taga Barangay Aliwanay samtang si Pierson taga Barangay Paliwagan.

Matod ni Police Major Christian Torres, hepe sa Balamban Police Station, nga ang tulo ka mga biktima sakay sa Yamaha nga scooter nga gimaneho ni Pierson samtang angkas silang Sultan ug Son. Sigun sa mga saksi nga kusog kaayo nga nakapadagan si Pierson.

Naatol usab nga niliko paingon sa tuo ang wing van nga gimaneho ni Renerio Remo, 46, taga Barangay Canduman, Siyudad sa Mandaue.

Tungod sa ka taas sa wing van, nikawat kinig lugar sa karsada sa pagliko.

Tungod sa kakusog sa pagpadagan sa nagsunod nga motorsiklo, napasok kini sa kilid sa wing van. / AYB, GPL

Nangalabay ang tulo gikan sa scooter. Si Pierson namatay diha-diha samtang sila si Sultan ug Son nangamatay sa tambalanan.

“Kining motor nga ga sunod same direction sila going to north, going to Asturias. Tungod sa overspeeding siguro, puno pud siyag karga nya kining wing van kompleto man, naa may mga lightings, tungod lang siguro sa iyang kakusog (motor) wala siya mag expect nga dili na diay siya ka lusot sa pikas lane kay na occupy man sa wing van, ang motor na pasok gyud sa ilawom,” matod ni Torres.

Sa pagsuwat ning taho, si Remo naa pa sa kapulisan samtang gipaabot ang mga pamilya sa mga biktima.(AYB, GPL)