GIREKLAMO ngadto sa Office of the Ombudsman Visayas si Cebu City Councilor Niña Mabatid sa iyang kanhi empleyado nga wa niya gipa-renew ang kontrata sa Cebu City Government.
Si Roldan de los Reyes niduso sa iyang 11 ka pahina nga reklamo labot sa Anti Graft and Corrupt Practices Act kagahapon, Septiyembre 21,2020 batok kang Mabatid.
Gipasanginlan ni de los Reyes si Mabatid nga nibaligya og dressed chicken, butane canisters ug face shields isip sideline nga negusyo ug giingong nihulga nga pugngan ang ilang sweldo kon di sila mosunod sa mando sa konsehal.
Sa iyang reklamo batok kang Mabatid, si de los Reyes nipasangil nga ang konsehal nipatawag og tigom kanila niadtong Abril sa tanang staff ngadto sa buhatan sa Pinoycare sa Capitol compound bisan sa pagdili sa mass gathering ug sa work from home scheme nga gipatuman sa Kagamhanan sa Dakbayan.
Matod ni de los Reyes nga siya nakugang atol sa tigom, dihang giingon nga si Mabatid nihatag og assignments sa iyang staff nga may kalambigitan sa bag-ong negusyo, pagpamaligya ug distribution sa dressed chicken ug ubang karne, matod niya.
Nipasangil si de los Reyes nga si Mabatid niluwat og memorandum sa Abril 24, nga nagmando sa iyang tanang mga kawani sa pagtrabaho nga inadlaw gikan sa Lunes ngadto sa Biyernes o Sabado ug Dominggo sumala sa iyang pagbuot.
“The purpose of the instruction was for the staff to serve the private business. This Memorandum was only posted in the chat group and was never forwarded to the HRDO (Human Resource Development Office),” pasangil ni de los Reyes.
Matod ni de los Reyes nga iyang gituman ang mando, apan iyang gisupak pagkadugayan.
“With strong determination and conviction that Councilor Mabatid committed an act of taking advantage of her position by directing us to sell chickens and other meat products, I refused to do the task assigned to me anymore, to which Councilor Mabatid got angry and she threatened us not to renew our appointment and also demanded us to resign,” matod ni de los Reyes sa iyang reklamo.
Apan, ang konsehal nga nahinabi sa Superbalita Cebu nanghimakak sa pasangil ni De los Reyes.
Iyang gihulagway nga way basehan ang giduso nga reklamo ug andam niyang tubagon sa Ombudsman.
Si Mabatid niingon nga nasuko kaniya si De los Reyes kay wala niya gipa-renew isip executive assistant sa iyang opisina gumikan sa pagkapalahubog, tapolan, trouble maker ug attitude problem ug wa na siyay kumpyansa ug pagsalig.
Dugang ni Mabatid nga iya na lang gihuwat ang kopya sa reklamo gikan sa Ombudsman sa di pa siya mohatag sa iyang opisyal nga tubag.
Gipahibawo usab niya nga giandam na usab ang counter-suit batok kang de los Reyes sanglit di tugotan ni Mabatid nga gub-on ang iyang pagkatawo pinaagi sa pagsang-at og way basehanan nga reklamo.
Ang konsehal nidugang nga namuhonan siya para adunay ika-negusyo ang mga tawo sa siyudad sama sa dressed chicken niadtong panahon sa pandemic ug iyang napamatud-an kay daghan siyag natabangan.
Dugang niya nga kaugalingon niyang sakyanan ang nihatod sa mga dressed chicken ug di sa gobyerno sukwahi sa gipalakaw sa social media.