MGA sakop sa Ygot drug syndicate ang tulo ka mga lalake nga nadakpan sa kapulisan sa Siyudad sa Sugbo atol sa buy-bust niadtong Dominggo sa buntag, Septiyembre 20, 2020, nga nakuhaan og pito ka kilo sa gituohang shabu nga mokantidad og P47.6 million.
Matod ni Police Colonel Josefino Ligan, officer-in-charge sa Cebu City Police Office, nga sigun sa ilang gihimo nga tactical debriefing sa mga suspek nga silang Rolando Ondoy Romeo, alyas Lando, manghod niini nga si Edward ug Calvin Hermoso Valdez, nga sila pulos courier. Sila giingong tigkuha sa supply sa illegal nga drugas nga gipadala sa tawo ni Ygot ug ipang apud-apud sa mga drug player sa siyudad ug lalawigan sa Sugbo, lakip na sa Bohol.
Apan bisan kon sila courier, mamaligya gihapon sila kon adunay mokuha kanila og dinagko nga supply gikan kanila.
Ang lider sa grupo nga si Rustico Ygot nadakpan sa mga sakop sa Philippine Drug Enforcement Agency 7 niadtong 2010 ug nabilango sa Zamboanga Penal Farm.
Siya usab ang live in partner ni anhing Jocelyn Encila nga nadakpan sa gilusad nga buy-bust operation sa Police Regional Office 7 ug Consolacion police station sa miaging tuig nga nakuhaan og 18 ka kilo sa gituohang shabu sulod sa iyangbalay. (AYB, dugang taho ni BBT)