ANG Siyudad sa Sugbo duna na lay dul-an sa 400 ka aktibong mga kaso sa coronavirus disease (Covid-19). Apan makapabalaka kay gikan sa 38 ka mga barangay nga Covid-free sa pipila ka mga semana nga nakalabay, nidailos kini ngadto sa 29 na lang.
Nagpasabot nga nasudlan og balik ang siyam ka mga barangay. Bisan usa lang ka buok ang matakdan, naa na sa kakuyaw ang tibuok barangay tungod sa direct contact sa natakdan. Naa gani kaso kaniadto nga 15 ka mga sakop sa usa ka pamilya ang natakdan sa usa ka urban barangay.
Mao gani nga gipalig-on og maayo sa Cebu City ang contact tracing. Ang contact tracing usa sa mga paaging gitumbok nga nakapaminos og maayo sa mga kaso sa Covid-19 sa dakbayan. Dali na man gud ma-isolate ang pasyente sa Covid pinaagi sa tracing team. Di na makapanakod ang posibleng carriers sa sakit kay dali na man nga ma-isolate. Apan bisan tuod ubos na kaayo ang mga kaso sa Covid-19, naa gihapon ang presensya sa kagaw.
Sa wa pa gipailawom ang dakbayan sa Sugbo ubos sa modified general community quarantine (MGCQ) ang Cebu City, ang mga opisyal pinangulohan ni Mayor Edgardo Labella mapanagan-on kaayo sa mao nga quarantine status. Nakahibawo man gud sila nga bisan unsa pa nga quarantine level, naa gihapon ang virus.
Kini ang rason nganong si Labella ug ubang mga mayor sa Metro Cebu hugot nga nagpatuman sa mga health protocol ug nipalabang og mga ordinansa alang sa pagpahamtang og bug-at nga mga multa sa makalapas.
Kining pagbalik sa pagdaghan sa mga barangay nga dunay mga kaso sa Covid-19 angay nga hinuktokan sa publiko. Angay nga huna-hunaon pag-ayo kon nganong kini nahitabo. Kini naingon niini tungod kay dunay mikompyansa.
Naa may mga awtoridad o wala, kinahanglan nga tumanon ang tanang health protocol. Mga barangay di magpanagana sa pagpatuman sa ordinansa.