KANHI empleyado ni Konsehal Niña Mabatid ang nikiha diha sa Opisina sa Ombudsman nga ang konsehal namaligya og dressed chicken ug uban pa. Abi gyud nako og nahuman na kining isyu kabahin sa pagpamaligyag manok.
Samtang niingon si Konsehal Mabatid nga iyang gipanghatag ang manok sa mga beneficiaries niini, naay gipangpasapasa karon sa Facebook ug Messenger nga video sa usa ka pick-up nga napuno og manok. Ang maong sakyanan naay dakong pintal nga ngalan sa konsehal. Nag-park kini sa usa ka eskina diin dunay mga tawo nga nanan-aw. Naa sab nga gipasapasa nga mga online ad nga naay price list sa gipangbaligya nga mga manok ug karne.
Alang kanako, seryuso nga pasangil nga kining mga staff sa Cebu City Hall ang gipatabang og baligya sa mga negusyo nga sideline. Naa na bayay nataktak ana sa una.
DOLOMITE
Dinhi sa Sugbo, naglibog ko nganong ang mining company sa dolomite maoy gipiit ni Gob. Gwen Garcia? Unya gipapirma og usa ka resolusyon ang mga mayor batok sa magmina ug pag-quarry. Namirma intawon ang mga mayor bisan og naay nag-mining ug nag-quarry sa ilang mga lungsod ug syudad.
Dinhi sa Syudad sa Talisay, nipirma si Mayor Samsam Gullas. Naa pay ubang mga mayor nga namirma. Apan di ba ma-conflict of interest hinuon sila?
Didto sa kaulohan, nakapangutana sab ko sa gipakita sa mga taga Manila. Naun-sa man kini sila nga daw naihas man sa dapit sa Manila Bay nga giabunohan og dolomite aron mahimong white beach?
Nagpunsisok diha dapit sa Roxas Blvd. ang mga taga Manila. Nalimtan ang social distancing. Nya naa sab ang wala nagmaskara. Tungod niini, napagan ang ilang police chief kay gikuwestyon nganong wala mangandam ug gisiguro ang mga health protocol.
Abi gyud nako og nangahadlok na ang mga tawo karon. Naa pa gyuy mga taho nga naghakot ang pipila ka mga grupo nga motan-aw sa maong kalihokan. Magpaabot na lang kita nga modaghan pa samot ang mga kaso sa Covid-19.
HOSPITAL
Gikuwestyon sa pamilyang Garcia ang pribadong hospital nga niateman nilang Nelson ug Marlon Garcia. Sila si Gob. Garcia ug Kong. PJ Garcia ang nagpa presscon. Dayon dunay aksyon batok sa hospital ug duha ka doctor ang kooperatiba nga gidumala sa pamilya.
Tan-awn nato kinsa ang modaog niining ilang isyu. Ang ako lang kay moguwa nga wala gyud diay pili ang SARS-Cov-2. Matod pa, gidudahan nga nangatakdan sila dihang nag terrain driving human sa usa ka tigum sa mga mayor didto sa Barili.
Kini lagi kunong magpundok nga walay maskara ug wala social distancing. @anol_cebu sa Twitter