WA pa gyud diay mahuman kining bulay-og natong sistema sa Covid-19.
Karon na sad duna silay gidakup nga ginang kay wa mag-face mask nga nanglaba ra unta gawas sa ilang panimalay.
Apan kumpiyansa ra nilang gibuksan sa publiko ang Manila Bay niadtong Dominggo. Ang resulta gikuninitan gyud. Maora ba’g mga ignorante nga karon pa nakakita og pekeng white sand.
Hasta sa Facebook nidagsa ang #Manila Bay Challenge diin naglumbaanay og post sa ilang mga photoshopped picture nga naa sila sa Manila Bay.
Mga kiyampaw nga way lingaw. Nadaut na sa Covid!?
PANGGUKOD
Ugma, Miyerkules, duna na say hearing ang Kongreso bahin sa ABS-CBN.
Ning higayona aron kulitugon kon lehitimo ba ang titulo sa yuta nga gibarugan sa ABS-CBN broadcast complex sa Quezon City.
Si Sagip Party-list Representative Rodante Marcoleta gihapon ang usa sa mga nagpaluyo ning maong imbestigasyon.
Apan unsa bay maani sa katawhan anang isyu sa ABS-CBN? Ang PhilHealth maoy dalia ninyo uy kay taxpayers money na ug bilyones ang nawa diha. Pastilan.
MABDOS?
Unsay tan-aw ninyo mabdos gyud kaha si Janella Salvador?
Sa akong tan-aw maorag tinuod kay sa mga bag-ong litrato ni Janella sa social media klaro ning nanambok.
Nisamot ang pagduda kay ang iyang mommy Jenine Desiderio tua karon sa United Kingdom diin giingong gikatakdang manangak ang 22-anyos nga aktres karong Oktubre.
Ang pamilya sa boyfriend ni Janella nga si Markus Paterson tua nagbase sa UK.
It’s always a blessing to have a baby so dapat lang ibandilyo na, dili taguon.
GAME 5 OR 6
Usa sa akong mga giatngan karon sa telebisyon ug sa online ang NBA playoff. Sukad pa sa una Los Angeles Lakers ug Lebron James fan na ko.
Apan bisan underdog ang Denver Nuggets karon dili kakumpiyansaan kay kahibawo ta sa kapasidad sa Nuggets nga makabangon gikan sa 3-1 deficit. Gahapon kon wa pa masud ang 3-pointer ni Anthony Davis pildi gyud unta tong Lakers.
Akong fearless forecast basta dili lang moabot sa Game 7 Lakers ang mo-champion. Pero kon maabtan nig Game 7 patay ang Lakers.
Mao nang ayaw na gyud intawon na ninyog paabta aron di masikwati akong pusta. Haha...