SUPERBALITA CEBU

Solid Earth miabag pagpamuhi og baboy

GIPALAPADAN sa Solid Earth Development Corp. (SEDC) ang proyekto niining pagpadako’g baboy sa tugkaran pinaagi sa pagdugang og duha pa ka hugpong sa siyam ka mga pamilya human ang unang upat nagmalahutayon na sa ilang panginabuhian.

“Gidumala na sa mga naka-una ang ilang panginabuhi-an isip usa na ka pamatigayon,” miambit si Mitzie Almira Carin, tadguma sa SEDC human resources and administration division, kabahin sa programa nga napatuman sa lungsod sa San Fernando.

Tig-abagan ang kompanya sa pagtipig sa mga halin ug liwat sa matag siklo, siya miingon. “Gibuhat na nila kini sa ilang kaugalingon, apan kanunay pa nato silang gisusi hangtud sa pagtapos pa ning tuig 2020.”

Migahin ang kompanya og 224,000 sa unang hugna nga bag-o lang natapos, ug midugang og 116,200 ning bag-o pa lang alang sa ikaduhang hugna sa dugang duha pa ka mga hugpong sa mga panimalay nga ubos ra ang kita sa Sitio Gorion sa Barangay Tongo, mibutyag si Carin.

Sama sa napatuman na, mi-apud-apod ang SEDC og usa ka baboy sa matag pamilya nga nakabenepisyo ug gisangkapan sila sa ipakaon, mga tambal ug bitamina.

Gipaabot sa SEDC ang programa sa hugpong nga gilangkoban sa mga pamilya nilang Genevieve Balasabas, Naneth Salado, Cresenciano ug Shirley Barnigo, ug lain pa nilang Diosdado, Elizabeth, Myra and Nancy, pulos Barnigo ang apilyedo, ug Feliza Secuya.

Nakasulod ning maong mga hugpong sa programa human ang matag usa nila nakahimo na og komunal nga alad nga may kakuha-an og tubig ug nakatuman sa mga panginahanglanon nga gilatid sa SEDC ug sa municipal agriculturist.

Miabag ang mga opisyal sa Tonggo sa pagpili gikan sa mga lumolupyo sa Gorion nga may kinadaghana’g tagbalay nga walay trabaho.

May 475 ka mga panimalay ang maong bukirang barangay nga may 2,298 ka mga lumolupyo. May 83 ka mga panimalay ang Gorion, samtang 92 porsyento sa mga lumolupyo mokita lang og ubos pa sa P10,000 matag bulan.

Nasugdan ang programa sa Nobyembre 2017 sa dihang nakigtagbo ang mga opisyal sa SEDC uban ni municipal agriculture officer Nelson Soronio ug kapitan Virgilo P. Siarot sa mga taga-Tonggo bahin sa proyekto.

Misugod ang unang upat ka hugpong nga may lima hangtud walo ka mga pamilya sa pagpamuhi’g baboy pagkahuman mitimaan ni Joseph Barnigo, pangulo nila sa Tonggo Purok 5 Gorion Organization, sa usa ka kasabutan pagka-Enero 19, 2018.

Nakabaton ang mga hugpong sa unang liwat sa ilang binuhing baboy pagka-Mayo ug Hunyo sa samang tuig, ug gipang-apud-apod sa uban nilang masigkahugpong hangtud nakapamaligya na sila og mga binuhi hangtod karon, mibutyag si Carin.

“Ang among pamaagi mao ang pagpasiugda sa malungtarong pag-uswag sa kinabuhi sa among silinganang komunidad.." siya miingon.

Gitumong nga modagan og duha ka tuig, gikuha’g balik sa SEDC ang puhunan gikan sa halin sa mga baboy sa unang tuig aron magamit ang pondo sa mosunod nga mga hugpong sa Tongo hangtud sa ika-unom nga siklo, matag usa moabot og 12 hangtud 16 ka semana.

“Niining maong paagi makat-on ang mga sakop sa hugpong sa pagdumala og tarong sa ilang puhunan ug kita,” mipasabot si SEDC community relations officer Gines T. Boltron.

Gibutyag niya nga ang upat ka hugpong nakahuman na og unom ka siklo, usa nila nakabaligya og kapin sa tres mil kilos ug hapit P70-mil nga kita sa usa nila.

Subay sa katuyuan nga napamatud-an sa unang upat la hugpong, mipadayon ang proseso sa tuyok sa pondo hangtud karon bisan kung natunol na sa SEDC ang proyekto sa mga benepisaryo.

Mipadayon ang duha ka mga bag-ong hugpong gamit ang mga nakat-unan sa nag-unang upat sa pagpamuhi og baboy. (Tampo)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph