WALA pay migawas nga mutestigo o makatudlo kung kinsa ang mipatay ni Mactan Barangay Councilor Zandro Augusto.
Kini bisan sa tanyag ni Lapu-Lapu City Mayor Junard Chan nga P1 milyone nga ganti alang sa pagsikop sa mamumuno kang Augusto.
Matod ni PCol. Clarito Baja, ang hepe sa Lapu-Lapu City Police Office (LLCPO), nga adlawng Lunes, Septiyembre 21, 2020 gitan-aw nila ang mga numero diin mamahimong makatext o tawaga ng mga nakasaksi sq panghitabo apan wala pay mga saksi ang mitumaw.
Alang kang Baja nga ang gibuhat ni Chan usa ka dakong tabang sa imbestigasyon labi na sa pagkuha og mga impormasyon kalabot sa insidente.
Dugang niya nga aduna man silay nadawat nga impormasyon nga makatabang nila sa ilang imbestigasyon apan kinahanglan pa nila kining i-validate.
Aduna na silay mga nakuha nga mga lead apan kinahanglan pa kini nilang i-follow up.
Padayon gihapon ang pag-imbestigar sa kapulisan sa dakbayan sa Lapu-Lapu mahitungod sa pagpatay ni Augusto.
Iya na sab gideriktahan ang intelligence team nga mu-abag sa imbestigasyon nga buhaton sa hepe sa Lapu-Lpau Police Station 3.
Nakigkoordinar nasab ang mga imbestigador sa maong kaso ngadto sa mga establishemento nga dunay CCTV nga duol sa lugar kung diin gipatay si Augusto.
Matod ni Baja ngadto sa Superbalita Cebu atol sa usa ka phone interview nga wala pa ma-interview sa ilang mga imbestigador ang pamilya tungod wala pa kini makatuo sa nahitabo.
Niadtong gabii sa Dominggo, Septiyembre 20, matod ni Baja, wala pa makuha sa pamilya ni Augusto ang lawas niini og anaa pa kini sa ospital.
Isip pagtuman sa health protocol dili una kini gipagawas ang lawas sa dili pa mugawas ang resulta sa swab test ni Augusto. (KFD)