GUMIKAN sa kakuwang sa kahimanan alang sa paspas nga pagprinta sa mga modules sa mga tinun-an sa pampublikong tunghaan, gitagaan og risograph machine ang Department of Education (DepEd) Lapu-Lapu City Division ni Kongresista Paz Radaza sa lone district sa dakbayan.
Moabot sa 5 ka mga risograph machine ang gidonar sa kongresista ngadto sa kadagkuan sa DepEd.
Usa pa hinuon ang nagamit niini sanglit ang uban moabot pa human gi-order sa supplier.
Dako na kining tabang sa mga magtutudlo alang sa kongresista hilabi na nga nagsingabot na usab ang pagbukas sa klase sa pampublikong mga tunghaan ubos sa modular learning karong Oktubre 5.
Nasayran sa kongresista nga nag-apas a pagprinta sa mga module ang mga magtutudlo atol sa iyang paglibotlibot sa mga tunghaan busa ang paghatag kanila og risograph machine.
Si Dr. Marcelita Dignos, Assistant Schools Division Superintendent mapasalamaton sa tabang sa kongresista. (GCM)