GILIMITAHAN na ngadto sa 100 ka mga kliyente matag adlaw ang makasulod sa mga ahensya sa kagamhanan nga naa sa JCenter Mall, Barangay Bakilid, Mandaue City.
Kini human nga adunay nadawat nga taho ang Mandaue City Legal Enforcement Unit (MCLEU) nga wala miobserba sa social distancing labi na sa linya gawas sa ilang opisina.
Sa pakighinabi sa Superbalita Cebu ni Edwin Jumao-as, ang nangulo sa MCLEU, miingon nga giadto nila niadtong Septiyembre 21, diin nakigsabot ang MCLEU ngadto sa mga sikyu sa Social Security System (SSS), Home Development Mutual Fund (Pag-ibig), sa Land Transportation Office (LTO) ug sa JCenter Mall.
Matod ni Jumao-as nga wala ra magkaproblema sa social distancingn sulod sa maong mga ahensya apan sa gawas niini diin ang mga tawo naglinya ug nagdasok.
Hinungdan nga mohatag og suhestyon ang MCLEU nga limitahan na nila ang ilang dawatong kliyent.
Misaad sab ang mga ahensya nga iimplementar ang maong suhestyon aron matuman ang social distancing.
Ang LTO mudawat lang og 100 ka mga kliyente samtang sa Pag-ibig ug SSS 50 ka mga kliyente.
Kadtong mga dili makasud sa mga ahensya hatagan og priority number alang sa sunod adlaw. (KFD)